​Дамба Аюшеев: «Джарун Хашорай субарга бүгэдэ арадые нэгэдүүлхэ»

Джарун Хашорай субаргын һэльбэн шэнэлэлгэдэ мүнгэ зөөри суглуулха талаар нигүүлэсхы сэдьхэлэй марафоной хоёрдохи шата үсэгэлдэр Улаан-Үдэ хотодо үнгэргэгдэбэ. Буряадай гүрэнэй филармониин байшан соо хүн зон олоороо сугларжа, энэ дэмбэрэлтэ һайхан хэрэгтэ 1 сая 848 мянган түхэриг хандиб үргөө. Тиихэдэ үхэр, хэдэн хонин ороо юм.

Марафон үдэшын 6 сагһаа эхилээд, 11 болоодүйхэн байхада дүүрээ. Хэжэнгэ аймагай захиргаанайхид засаг дарга Геннадий Лхасаранов түрүүтэй, аймагай һунгамалнуудай зүблэлэй түлөөлэгшэд, Хэжэнгын дасанай ламанар шэрээтэ Гармажаб ламхай түрүүтэй, аймагай эдэбхитэд нютагаархидтаяа нэгэдэжэ, үүсхэһэн хэрэгээ номын ёһоор бүтээбэ гээшэ.

Нютагаархид гэхэдээ, тэрэ тоодо бүхы дэлхэйгээр, мүн гүрэнэйнгөө бусад можо нютагуудаар, Буряад оронойнгоо дэбисхэрээр таран ажаһууһан хэжэнгээрхидые хэлэнэбди. “Хэжэнгэ” эблэлэй түрүүлэгшэ, Буряадай үндэһэтэнэй 1-дэхи лицей-интернадай захирал Булат Шойнжонов Улаан-Үдэдэ ажаһуудаг нютагаархидаа нэгэдүүлжэ, энэ хэрэгтэ хам оролсоо.

Гэхэтэй хамта дэлхэй дээрэхи оройдоол хоёр субаргын нэгэн болодог, гүрэн соогоо ори ганса байһан Джарун Хашорай субаргын һэльбэн шэнэлэлгэдэ Буряад ороноймнай бүхы нютагуудай һүзэгтэнэй хубитаяа оруулжа байһаниинь һайшаалтай. Жэшээнь, “Бест Плюс” компаниин захирал, Түнхэнһөө гарбалтай Вячеслав Байминовһаа 400 мянган түхэригэй сертификат ороо. Вячеслав Намсараевич олон хэрэгтэ, хэмжээ ябуулгануудта эбээн тэдхэгшэ болодог гэжэ мэдээжэ. Энэ удаашье хубитаяа оруулба гээшэ.

Хэжэнгын Шанаа нютагай үндэр наһатай Аграфена Баировна Баирова 200 мянган түхэриг хандиб үргэжэ, сугларагшадай һайшаалда хүртөө. Энэ хүмнай мүнөө Улаан-Үдэдэ ажаһууна, байгша оной декабрь соо 90-тэй болохо. Аграфена Баировна зорюута Джарун Хашорайнгаа субаргада гэжэ 8 жэлэй туршада пенсиеэ нөөсэлһэн байха юм.

“Яһала бараг пенситэйб. Сохом 20 мянга байха. Тиигээд лэ энэ мүнгэ суглуулжа шадааб. Һайхан хэрэгнай урагшатай бүтэг лэ даа. Джарун Хашораймнай субарга шэнэлэгдэг лэ даа”, - гэжэ үндэр наһатан хэлээ.

Хэмжээ ябуулгада Арадай Хуралай Түрүүлэгшын орлогшонор Баир Жамбалов болон Цырен-Даша Доржиев, Арадай Хуралай Аппарадай Хүтэлбэрилэгшэ Цыденжап Батуев түрүүтэй һунгамалнууд, элүүрые хамгаалгын сайд Дамби-Нима Самбуев, Олониитын танхимай хүтэлбэрилэгшэ Баир Бальжиров болон бусад хабаадаа гэжэ тэмдэглэлтэй.

Бандидо Хамба лама Дамба Аюшеев үгэ хэлэхэдээ, Джарун Хашорай субарга Хэжэнгэ аймагай зониие нэгэдүүлээ, эбтэй болгоо, харин мүнөө бүхы Буряадайнгаа ажаһуугшадые нэгэдүүлхэ гэжэ онсолоо юм.

Джарун Хашорай субаргын һэльбэн шэнэлэлгэдэ бүхыдөө 7 сая түхэриг хэрэгтэй гэжэ һануулая. Февралиин 15-да Хэжэнгэ аймагта үнгэргэгдэһэн марафоной үедэ 1 сая 206 мянган түхэриг ороһон байна. Гэбэшье хүн зон марафонһоо гадуур хубитаяа оруулжал байһаар. Тиигэжэ байгша оной сентябрь соо үнгэргэгдэхэ Джарун Хашорай субаргын 100 жэлэй ойн баяр болотор бүхы ажалаа дүүргэжэ үрдихэ хэрэгтэй.

Анна Огороднигой гэрэл зурагууд