![](/upload/resize_cache/iblock/157/780_780_1/y140xw26qg84wnaejnyl98z66ezll8ev.jpg)
Һонирхолтой хэмжээ ябуулгануудай тоодо хүдөө ажахын агаарай дронуудай ажал харуулалга ороно. Тэдэнэй туһаламжаар үрэһэ таряа, тиихэдэ таряалан дээгүүр химиин бодосуудые сасаа. Агродрон хэрэглэлгэ хадаа хүдөө ажахыда мүнөө үеын, найдамтай шэглэл болоно.
«Хүдөө ажахы - манай холын хараатай шэглэл болоно. Энэ хадаа, нэн түрүүн, хүдөө нютагуудай хүн зоной ажабайдал, уласай хүгжэлтэ, уласаймнай, бүхы гүрэнэймнай эдеэ хоолой болон хоол хүнэһэнэй аюулгүй байдал болоно. Тиигээд хүдөө ажахын хүгжэлтэдэ нүлөө үзүүлдэг бүхы хэмжээнүүдые дэмжэнэбди. Энэ жэлдэ бидэ 17 хубяар тарилгын талмай нэмээбди. Үнгэрһэн жэлдэ ехэ ургаса хуряахадаа, гурба дахин рекорд табиһан байгаабди: таряагаар, огородой эдеэнэй хэмжээгээр, хартаабхаар. Тиихэдээ бидэ найдамтайгаар урагшаа дабшанабди», - гэжэ Алексей Цыденов тэмдэглээ.
Ургамал ургуулдаг талын һайндэртэ үшөө нэгэ шухала хуби хадаа хүдөө ажахын элдэб техникын үзэсхэлэн дэлгэгдээ. Хүдөө ажахын техникэ хангадаг дилернүүдэй тоо дүрбэ болотор нэмэгдэбэ; урид нэгэл компани хүдэлдэг байгаа. Мүн элдэб компанинуудай хүдөө ажахын һалбарида хэрэгтэй бусад элдэб бүтээлнүүдые харуулһан үзэсхэлэн табигдаа.
Суута «Облепиховый» совхозой дэбисхэр дээрэ шасаргана болбосоруулха шэнэ мастерской нээгдэбэ. Мастерскойдо шасарганын үндэр шанартай сэнтэй тоһон үйлэдбэрилэгдэдэг. Үйлэдбэриин хүсэн – шасарганын концентрат жэлдээ 1,5 тонноһоо дээшэ болоно.
Зүүн Сибириин гүрэнэй технологиин болон хүтэлбэрилгын ехэ һургуули шасарганын бүтээлнүүдэй шэнэ түхэлнүүдые: хатааһан жэмэс, элдэбын ундан, сай, амтатай эдеэн, энергетическэ шэхэр дурадхаа. Тэрэ һургуули «Темник» гэһэн хүдөө ажахын бүлгэмтэй хэлсээ баталжа, комплексно болбосоруулгын технологи болон хэрэгсэлнүүдые дамжуулһан байна. Гэхэтэй хамта олзын хэрэг эрхилэгшэ Хитадһаа, Алтайһаа, Кавказһаа ерэһэн дурадхалнуудые шэнжэлээ - ВСГУТУ-гай бүтээлнүүд болон хэрэгсэлнүүд шэнжэ шанараараа эрхимүүд гэжэ шалгараа.
Мал эмнэлгын албанай оньһон түхеэрэлгэнүүд һайжаржа байна. Адуу малда тарилга хэхэ түхеэрэлгэнүүд, яармагуудта хүдэлхэ, эдеэ хоолой шанар шалгаха мобильна комплекснууд абтаа.
Тиихэдэ Буряадай Толгойлогшо арад зоной дунда Ацула гэжэ мэдээжэ Темник тосхондо шасаргана болбосоруулдаг мастерскойдо хүдэлдэг мэргэжэлтэндэ гэрэй түлхюур барюулаа. Багшанарта, эмшэдтэ, малай эмшэдтэ, хүдөөгэй соёлой байшангуудай хүдэлмэрилэгшэдтэ болон бусад мэргэжэлтэдтэ хүдөө нютагуудые хүгжэлтын нэгэдэмэл түсэлөөр 16 гэр баригдаха, 64 квартира үгтэхэ юм.
Таряашадай дунда газар хахалагшадай мүрысөөн эмхидхэгдээ. Үзэсхэлэн-фестивальда ерэһэн айлшадта элдэб мүрысөөнүүд, шангуудтай викторина эмхидхэгдээ.
Автор: Сэнгэ РИНЧИНОВ
Фото: Буряад Уласай Хүдөө ажахын ба эдеэ хоолой яаманай Хэблэлэй албанай гэрэл зураг