![](/upload/resize_cache/iblock/3a8/780_780_1/kzd0u4to4a0dox9p2w7gur7r2cmoync9.jpg)
“Ринчин – дээдын изагуурай”
Манай гүрэнэй тон үсөөн хүнүүдэй тоодо Буряадай элитэ дуушан, хүгжэмшэн, олзын хэрэг эрхилэгшэ, филантроп, блогер, “Һайн юумые суг хамта бүтээе” гэһэн социальна түсэбые байгуулан ябуулагша Дашицыренов Ринчин Львович хүндэтэй һуури эзэлдэг. Тэрэнэй энэрхы сэдьхэлэй элшэтэй үргэн ехэ хэмжээнүүдые нэгэ хүнэй бэшэ, харин бүхэли эмхи зургаанай ажаябуулгануудтай сасуулмаар юм.
Буряадай, Россиин үндэр тайзануудаар ялас гэмэ амжалтатайгаар дуу хүгжэмөө зэдэлүүлэн суурхадаг артист – боди сагаан сэдьхэлтэй филантроп, аша үрэтэй волонтёр.
Ринчин Дашицыренов 1991 ондо дэлгэр һайхан Хэжэнгэ нютагта түрэһэн намтартай. Ринчин гэжэ нэрэ монголоор “дээдын изагуурай”, “гайхамшагта, онсо ондоо гарбалтан” гэһэн удхатай. Түбэдөөр Ринчин “энэрхы дурлал”, “нангин сэнтэй” гээд тайлбарилагдадаг. Харин Хитадта Ринчин гэһэн нэрэ “эрдэнитэ баялиг” гээд оршуулагдадаг ха. Тиимэһээ зүүн зүгэй зурхайгаар, һара наранай, одо гарагуудай тусхай һайн байдалда тохёолдоһон үедэ түрэһэн үхибүүндэ тус нэрэ үгтэдэг гэжэ эли. Ринчин Дашицыренов алишье талаараа оюун бэлигтэй, дээдын адис тамгатай хүнүүдэй нэгэн гэжэ тоосоогүй.
Бурхадые зурадаг
Хүбүүн бага наһанһаа хүнгэн атлетикэдэ дуратай, абьяастайгаар дашууран эрхилдэг, “Тамирай мастерай кандидат” гэһэн нэрэ зэргэдэ хүртэһэн байна. Теэд гэмтэһэн ушараар тамиршан болохо аргагүй байшоо.
Үшөө Ринчин түрэхын зураг зураха дуратай. Байгаалиин үзэсхэлэнгүүдэй, хүнүүдэй дүрсэнүүдэй хажуугаар буддын шажанай бурхад сахюусадые урлан зураха аргагүй дуратай. Үшөө 9-дэхи ангида һураха үедөө бурхадай дүрсэнүүдые зуража эхилһэн юм. Теэд юрын хүнүүдтэ бурхадай дүрсэнүүдые урлан зурахань хорюултай гэжэ эли. Тиимэһээ хүгшэн эжынь Ринчиниие Улаан-Үдын Халзан Толгой гэһэн газарта оршодог дасан абаашажа, тэндэхи Түбэдэй Римбүүшэ багшаһаа нангин дүрсэнүүдые урлахын тусхай абиша зүбшөөлдэ – лүндэ хүртөөһэн заяатай.
Артистын алдарта замаар
Дунда һургуулиин удаа зурахын абьяас бэлигтэй ба геометриин хэшээлнүүдтэ дуратай хүбүүн Москва хотын архитектурна институдай оюутан боложо ороһон байна. Теэд ниислэл хотодо һураха хуби заяагүй байшоо юм. Гэртээ бусаад, Зүүн Сибириин гүрэнэй соёл урлалай академиин театрай факультедтэ һуража, амжалтатайгаар түгэсхэһэн.
Үшөө оюутан ябаха үедөө Ринчин Дашицыренов “Намайгаа бү мартаарай” гэһэн түрүүшынгээ хүгжэмэй видеоклип буулгаһан. Тиимэ дээдын зохёохы мэдэрэлэй хүсэл хүбүүнэй зүрхэ сэдьхэлдэ зуниинь, үбһэ сабшалгын үедэ түрэһэн юм. Ерээдүйн артист өөрөө толгой соогоо сценари зохёон найруулһан.
- Һанаа бодолдомни ороһон элдэб янзын зураглалнуудые холбожо, ёһото “хүгжэмэй мозаика” суг- луулаа һэм, - гэжэ артист хөөрэнэ. Удаань Павел Будаев гэһэн гэрэл зураг буулгагшада хандажа, 1,5-2 һарын туршада видеоклип бүтээгээ бэлэйбди. Улаан-Үдын зугаа нааданай нэгэ түбтэ шэнэ клиптэеэ танилсуулга үнгэргөө һэн. Тэрэнэй һүүлээр “Ариг Ус” гэһэн Буряад Уласай теле-субаг шэнэ клипыемнай дамжуулан харуулха тухай бидэнтэй хэлсээ баталһан юм. Нэгэ жэлэй туршада манай ролик үдэр соо 10-15 дахин тус субагта зэдэлдэг байгаа.
Ринчин Дашицыренов саашадаа олон тоото хүгжэм дуунай урилдаануудта ялас гэмэ илалтануудые туйлажа, буряад эстрадын “одон” болоһон. Шэтэ, Москва, Санкт-Петербург хотонуудаар, Хальмаг, Тува болон бусад уласуудаар гастрольнуудта ябажа, харагшадай һайшаалда хүртэдэг.
2023 ондо Андрей Малаховай Арадай нэгэдэлэй үдэртэ зорюулагдаһан дамжуулгын үедэ Ринчин Дашицыренов Айдын Монгуш гэһэн Тува арадай дуушанай “Приезжай ко мне, брат” гэжэ дууе буряад, тува ба ород хэлэнүүд дээрэ уянгата гоёор гүйсэдхэһэн юм.
Үншэн үхибүүдтэ баяр жаргал бэлэглэдэг
Элитэ артист Буряад Уласай үншэн үхибүүдэй бүхы гэрнүүдээр ябажа, туһаламжа үзүүлдэг заншалтай. Тиихэдээ амтатай эдеэ хоол ба үнэтэй сэнтэй бэлэгүүдые абаашажа барюулхаһаа гадна заабол үхибүүн бүхэнтэй харилсан хөөрэлдэжэ, энэрхы сэдьхэлэй элшээр дулаасуулжа, бишыхан зүрхэндэнь урма зориг бадараахые оролдодог. Мүн лэ хотонуудай соёлой, сэнгэн наадалгын түбүүд руу абаашажа, үншэн үхибүүдые наадхуулжа хүхеэдэг, амтатай эдеэгээр хүндэлдэг, зол жаргал бэлэглэдэг юм.
Байгша ондо Ринчин Дашицыренов Агын тойрогой Шэнэ-Орловск һууринай үншэн үхибүүдэй гэртэ ошоһон байна. Тиихэдээ гоёор зурадаг басаганда - үнгын шэрэ будагуудые, альбомуудые, боксын тамирта дуратай хүбүүндэ – тусхай малгай ба перчаткануудые бэлэглээ. “Өөртөө абаһан мэтээр шэлэжэ абааб даа”, - гэжэ дуушан хэлэнэ.
Удаань амтатай хүндын эдеэнтэй хамта үхибүүн бүхэндэ һанагдаагүй сэнтэй бэлэгүүд – смартфон-телефонууд бэлэглэгдэһэн байна. Үншэн хэнзэ үхибүүдэй гунигтай нюдэнүүд гансата ялалзажа, ёһото һайндэр болоо һэн.
- Үншэн үхибүүдтэй уулзалгын удаа ехээр хайрлажа, cэдьхэлни хүлгэдэг, - гэжэ Ринчин Львович хэлэнэ. - Тиигээд дахин иишээ бусахаб даа гэһэн бодолнуудаар һанаагаа тэгшэрүүлхые оролдогшоб, - гээд, тэрэ тэмдэглэнэ.
Сэрэгшэдтэ туһаламжа
Ринчин Дашицыренов өөрын мүнгөөр шанга хүсэтэй авто-унаануудые болон тусхай оньһото хэрэгсэлнүүдые абажа, сэрэгэй операциин газар руу эльгээдэг. Тиихэдээ саг үргэлжэ таһалдуулангүй мотоциклнуудые, дронуудые, тепловизорнуудые г.м. эльгээжэ, бусад сэнтэй туһаламжануудые үзүүлдэг аша габьяатай.
Тэрэнэй хажуугаар элитэ блогер Ринчин Дашицыренов авто-унаануудые шүүлгын наадалгануудые эмхидхэдэг. Тэрэнэй ашаар сугларһан мүнгэн үншэн хүүгэдтэ ба сэрэгшэдтэ туһаламжын хэрэгтэ ошодог.
Автор: Баярма БАТОРОВА
Фото: Ринчин Дашицыреновэй дурадхаһан гэрэл зураг