![](/upload/resize_cache/iblock/7be/780_780_1/vgeqp1ta7mhi9hhjl1wsc80l5ccg6pv0.jpg)
Зүрхэ сэдьхэлээрээ нэгэдэжэ
Мүнөөнэй хүндэ хүшэр сагта олон үншэн хэнзэ, үбшэн эрэмдэг хүнүүдтэ болон тусхай операцида хабаадаһан сэрэгшэдтэ улад зоной зүгһөө ехэ туһаламжа ба дэмжэлтэ хэрэгтэй болоно. Манай нютагай олон мянгаад энэрхы һайхан, боди сэдьхэлтэй хүнүүд зүрхэ сэдьхэлээрээ нэгэдэжэ, өөрын һайн дураар хамтаран, үе сагайнгаа бэрхэшээлнүүдтэй тэмсэнэ.
Мүнөө дээрээ Буряад Уласта хамта 90 000-һаа үлүү волонтёр хүсэ шадалаа, сагаа гамнангүй, ямаршье магтаал ба шагнал хүлеэнгүй, үдэр бүри олоной түлөө оролдожо хүдэлнэ. Ёһотой манай үе сагай баатарнууд! Сэрэгэй тусхай операциин дэбисхэрнүүдээр, госпитальнуудаар, үншэн, үлбэр зоной байрладаг гэрнүүдээр ябажа, энэрхы сэдьхэлэй элшээр гэрэлтүүлдэг, баяр жаргал бэлэглэдэг, этигэл найдал түрүүлдэг эрхим түрүү хүнүүд лэ! Ажаһуугшадай һайн дураар оруулһан мүнгөөр хэрэгтэй эд зүйлнүүдые худалдажа абаад, масксетьнүүдые гүрэдэг, сэрэгэй тусхай онь- һото аппарадуудые абаад, авто-унаануудые заһабарилаад, амтатай эдеэ хоол суглуулаад, сэрэгшэдтээ эльгээдэг лэ.
Анимациин хүүхэлдэйн костюмтай
Буряад Уласай бүхы улад зон – хүгшэн залуугүй булта эбтэй эетэйгээр тахал үбшэнтэй, байдалай бэрхэ- шээлнүүдтэй, Эхэ оронойнгоо дайсадтай эрэлхэгээр тэмсэнэ. Тэрэнэй түрүүшын жагсаалай зэргэдэ буряадай эрхим хүбүүдэй нэгэн Золто Михайлович Жамсуев нютаг зоноо хүтэлбэрилэн ударидадаг габьяатай. Мүнөө тэрэ 17-дохиёо сэрэгэй тусхай операциин газарта ошоод байна. Тэрэ Захааминай аймагай Ехэ Сахир гэһэн нютагта түрэһэн юм.
- Би эмнэлгын училищи дүүргэһэн, эмшэн мэргэжэлтэйб. Мүнөө ВГИК-гэй заочно таһагта угсаатанай Соёлой түбэй хүтэлбэрилэгшын мэргэжэлээр һуранаб, - гэжэ Золто хөөрэнэ.
Үшөө оюутан ябахаһаа эхилжэ, Ринчин Дашицыренов гэжэ элитэ дуушантай ба буряад эстрадын бусад “ододтой” суг хамта үбшэн үхибүүдтэ туһаламжын кон- цертнүүдые эмхидхээбди. Тэрэ “Творим добро вместе” гэһэн түсэлөөр хоёр жэлэй туршада хүтэлбэрилөө һэм.
- Юундэ иимэ хэрэг эрхилнэбиб? Би хододоо хүнүүдтэ туһалха гэһэн эрмэлзэл, хүсэлтэйб. Эмнэлгын колледждо һураха үедөө тусхай анимационно хүүхэлдэйн костюм үмдөөд, ядуушуулда туһа хүргэлгын мүнгэ суглуулдаг хайрсаг баряад, Улаан-Үдын “Пионер” гэһэн түбөөр ябаа һэм. Тэрэ үедэ 16-тай байгааб. Тиигэжэ хоёр часай туршада нари үбшэндэ нэрбэгдэһэн эхэнэртэ туһаламжын 50 000 түхэриг суглуулжа үгөө бэлэйб.
Үншэн үхибүүдые баярлуулаа
Золто Жамсуев 2019 он- до Захааминай аймагай «ДоброДом» гэһэн түбэй хүтэлбэрилэгшөөр томилог- доһон байна. Тус түб үбшэн, эрэмдэг, ганса бэе наһажаал хүнүүдтэ, ажалай ба дайнай ветерануудта, олон үхибүүдтэй бүлэнүүдтэ туһаламжа үзүүлдэг юм. Һайн дуратан ганса бэетэй наһажаал хүнүүдтэ гэрэйнь ажал хэрэгүүдтэ туһаламжа үзүүлхэ, аймагай хүндөөр үбшэл- һэн үхибүүдэй һанал хүсэлнүүдыень бэелүүлхын тулада спонсорнуудые бэдэржэ олоод, үгэһэн мүнгөөрнь Шэнэ жэлдэ дуратай бэлэгүүдые барюулжа, зол жаргал бэлэглэдэг юм.
Волонтёрнууд “Баянгол” гэһэн эрэмдэг хүнүүдэй байрладаг социальна һуурин ошожо, туһаламжа үзүүлдэг. Эндэ һая тэндэхи үхибүүдые Байгал абаашажа сэнгүүлээ. Ехэнхинь үншэдэй гэрһээ гараһан хүүгэд Байгалые оройдоошье хаража үзөөгүй байшоо юм. Үншэн хэнзэ, үбшэн, эрэмдэг үхибүүд түрүүшынхиеэ Байгал дээгүүр катераар тамаржа, Улаан-Үдэ хотын үзэсхэлэнгүүдтэй танилсаа, дасан бараалхажа мүргөө, солонгос ба хитад эдеэ хоолтой кафенүүдтэ амтархан эдеэлһэн байна.
Золто Жамсуевай хүтэлбэрилдэг “ДоброДом” түбэй волонтёрнууд сэрэгэй тусхай операциин түрүүшын үдэрһөө эхилжэ, сэрэгшэдтэ туһаламжа үзүүлдэг. Оло дахин тэндэхи госпитальнуу- даар ябажа, нютагайнгаа шархатаһан сэрэгшэдтэй уулзажа, туһаламжа, дэмжэлтэ үзүүлдэг.
Гуманитарна туһаламжын хэмжээндэ үдэр бүриин хэрэгсэлнүүдэй хажуугаар үнэтэй сэнтэй сэрэгэй оньһото техникэ, коллиматорно прицелнүүдые, тепловизорнуудые г.м. үшөө олон шухала зэбсэгүүдые суглуулжа эльгээһэн. Мүнөө дээрээ Золто Жамсуевай хүтэлбэри доро Захааминай аймагай улад зон арбаад сая түхэригэй туһаламжа үзүүлһэн гэжэ эли. Мүн лэ гэртээ бусаһан сэрэгшэдые хүхэ номин хадагаар золгожо, хүндэтэйгөөр угтадаг заншалтай.
Золто Жамсуевай хэлэһээр, баян дэлгэр байгаалитай, энэрхы һайхан сэдьхэлтэй ажаһуугшадтай түрэл тоонто Захаамин нютагынь тэрээндэ хүсэ шадал үршөөдэг, бэрхэтэй сагта адислажа, заяанайнь замые аршалан заладаг.
Автор: Баярма БАТОРОВА
Фото: Золто Жамсуевай дурадхаһан гэрэл зураг