​Буряадай эмнэлгын һалбарида - үндэр туйлалта 

Буряад Уластамнай түүхэтэ хэрэг болобо. Ушарынь гэхэдэ, үбшэнтэндэ донорой бөөри һуулгаха операци хэгдэбэ.

- Энэ хадаа эмнэлгын һалбарида амаргүй ехэ туйлалта болобо. Иимэ эмнэлгэ урид манай нютагта хэгдэдэггүй ааб даа. Буряадтамнай бөөриин үбшэнтэй, диализта ябадаг 500 гаран хүн тоологдоно. Эдэнэр диализай аппаратһаа холо ошохо аргагүй. Тиимэһээ бидэ зондо туһалха зэргэтэйгээр эмшэдые һургаабди, хэрэгтэй оньһон түхеэрэлгэнүүдые худалдажа абаабди, - гэжэ Буряад Уласай Толгойлогшо Алексей Цыденов хэлэбэ.

Тус операци Семашкын нэрэмжэтэ эмнэлгын газарта хэгдэһэн байна. Москва хотоһоо ерэһэн Шумаковай нэрэмжэтэ түбэй эмшэдтэй суг Буряадаймнай эмшэд иимэ эмнэлгэ тон түрүүшынхиеэ хэбэ. Түрүүшын операци 40 наһатай эхэнэртэ хэгдээ, тэрэнэй түрэлһөөнь бөөри абажа һуулгаба.