​Малай тэжээл бэлдэгдэhээр

Ниитын үхэр малдаүбhэ тэжээл бэлдэхэ хүдэлмэри Буряадта 83 процент дүүргэгдээд байна.

Тиигэжэ нэгэ толгой эбэртэ бодо малда 6,8 центнер хоол нѳѳсэлэгдѳѳ гээд Буряадай хүдөө ажахын яаманай ургамалай таhагые даагша Андрей Бадмаев манай сурбалжалагшадтай мэдээсэбэ. Тодорхойлбол, мүнѳѳдэрэй байдалаар, республикымнай 352 мянган гектар талмайда үбhэ ногоон сабшагдажа, 348 гектарhаань үбhэн тармагдажа обоологдоод, хорёо хотонуудта оруулагдаад байна. Энэнь түсэбэй 83 процент болоно гэхэ гү, али нёдондонойхитой зэргэсүүлхэдэ, 99 процент гэжэ харуулна. 527 мянган тонно үбhэн бэлдэгдээ, энэнь түсэбэй 81 процент болоно, недондонойхитой жэшэбэл, энэ удаа 131 процент хуряагдаа гэжэ тэмдэглэхэ хэрэгтэй. Шэмэтэ хоолоор яhала hайн дүнгүүд туйлагдаа, унгэрэгшэ жэлhээ 29% ехээр энэ тэжээл бэлдэгдээ гэжэ хүдөө ажахын яаманай таhагые дагша Андрей Бадмаев урматайгаар хөөрөө. Тон hайн дүнгүүдые Бэшүүрэй аймаг харуулна. Тэндэ нэгэ толгой малда 13,5 центнер тэжээл нөөсэлөө. Баргажанда нэгэ толгой малдаа 13,4 центнер, Хойто-Байгалай аймагта - 10,2 центнер бэлдээ, бэшэ аймагууд хойноhоонь hубарина. Дуталдаhан тэжээлэй хоол таряа хуряалгаhаа хүсэлдүүлэгдэхэ түсэбтэй. Тиигэжэ hолоомонhоо эхилээд, орооhо таряан үбэлжэлгэдэ нөөсэлэгдэхэ зэргэтэй. Даб дээрээ 9 аймаг тэжээлэй ургаса хуряалгада ороод байна. Уларилай хүйтэршөөгүй дээрэ хуряалгынгаа ажалые дары дүүргэхэ тусэб табигдана. Бэшүүрэй, Зэдын, Прибайкалиин, Хойто-Байгалай болон Ахын аймагууд энэ ажалаа түгэсхөө, баргажанайхид, захааминаархин, загарайнхид болон түнхэнэйхид харюусалгатай энэ хаhаяа дүүргэхэ тээшээ дүтэлэнхэй. Зунай эхин хуурай байжа, ажахынууд ган гасуурта хохидоод абаа, теэд хожомой хура бороон ургасада яhала hайнаар нүлөөлөө гээд Андрей Бадмаев тэмдэглээ. Тиин ган гасуурта ажахынууд 397 миллион түхэригэй гарзада ороо. Тэрэнииень хүсэлдүүлхэ талаар Буряадай Хүдөө ажахын болон эдеэ хоолой яаман ажал ябуулаа. Россиин хүдѳѳ ажахын яаманда эльгээhэн саарhа дансануудай дүнгөөр, Москва 309 миллион түхэригэй гарзыемнай хүсэлдүүлхэ болоо. Хэзээ түлэгдэхэнь мэдэгдэнэгүй, нёдондо декабриин хуушаар 324 миллион түхэриг эльгээгдэжэ, ган гасуурта дайруулhан ажахынууд гарзаяа хааха аргатай болоо hэн гээд hануулмаар.