​Спортын тобшо һонинууд

Барилдаан

Клиппан (Швеция). “Klippan Lady Open-2017” гэһэн уласхоорон­дын мүрысөөндэ Буряадаймнай барилдааша басагад шангай хоёр һуури эзэлээ.

Эдэ тулалдаанууд олон жэлэй ху­гасаа соо дэлхэй дээрэхи түрүү та­миршадые суглуулна. Энэшье удаа 10 гаран гүрэнүүдэй түлөөлэгшэд суглараа. Японой басагадай коман­да болон 2016 ондо Олимпиин наадануудта шалгарһан барилдаашад эндэ ерээ.

60 килограмм хүрэтэр шэгнүүртэ Ульяна Тукуренова шангай хоёрдо­хи һуурида гараа. Венгриин болон Белоруссиин тамиршадые шүүжэ гараад, һүүлшын уулзалгада Ород гүрэнэй үшөө нэгэ тамиршан Юлия Пронцевич гэгшэдэ булигдаһан бай­на. 53 килограмм хүрэтэр шэгнүүртэ аяар 23 хабаадагшад хибэс дээрэ га­раа.

Манай Буряадай Стальвира Ор­шуш гэжэ тамиршанай хүрэл ме­дальда хүртэһэндэ баярламаар.

Шэхэ хатуушуулай спорт 

Якутск. Барилдаагаар Ород гүрэнэй чемпио­нат үнгэрһэн амаралтын үдэрнүүдтэ түгэсэбэ. Эндэ Буряадай тамиршад гурбан медальда хүртөө.

Тус тулалдаанууд тон ехэ удха ша­нартай юм. Ушар гэхэдэ, Сурдлимпиин наадануудта ошохо түлөөлэгшэд эндэ элирхэ байгаа.

Залуушье һаа, мэдээжэ Александр Цоктоев алтан медальда хүртэжэ шадаа. Мүн Бальжинима Раднаев болон Александр Трескин гэгшэд мүнгэн медальнуудые абаа. Тэдэ хоёр финалда Саха-Яхадай Уласай түлөөлэгшэдтэ шүүгдээ.

Бокс

Минусинск (Красноярска хизаар). Һүүлэй үедэ холо ойгуур Буряад ороноо суурхуулжа ябаһан боксёр басагаднай эндэ дахинаа амжалта туйлаба.

Сибириин федеральна тойрогой мүрысөөнүүд томо тулалдаануудай эхин боложо үгэдэг гээшэ. Эндэ Бу­ряадаймнай басагад юһэн медальтай гэртээ бусаба. Юлия Арефьева, Алек­сандра Будаева болон Кристина Тка­чёва гэгшэд түрүүшын һууринуудые эзэлһэн байна.

Нерюнгри (Саха-Яхад Улас). Эндэхи боксын түрүүшүүлэй нэгэн ябаһан Сергей Исмаиловай дурас­хаалда зорюулагдаһан бүхэроссиин хэмжээнэй мүрысөөндэ Буряадай түлөөлэгшэд хоёр медаль абаба.

Жэл бүри болодог эдэ тулалдаа­нуудта түрүү һуури эзэлэгшэд Оро­дой спортын мастер боложо тодор­дог гээшэ. Уайн Эргит болон Доржо Дахаев гэгшэд мүнгэн медальнуудта хүртөө.

Бага футбол

Красноярск. “Бага футбол - һургуулинуудта” гэһэн бүхэроссиин түсэлэй хэмжээндэ Сибириин фе­деральна тойрогой командануудай дундахи наадануудта Буряад ороной хүбүүд, басагад хоёр медаль абаба.

2005-2006 онуудай тамиршад эгээл ехэ амжалта туйлаа. Улаан-Үдэ хотын 49-дэхи һургуулиин шабинар чемпионой нэрэ зэргэдэ хүртэжэ, Москвагай финалда ошохо эрхэтэй болобо. Тэдэ һүүлшын уулзалгада Томск хотын түлөөлэгшэдые 2:1 гэһэн тоотойгоор шүүбэ.

Энэл һургуулиин 2003-2004 онуудай хүбүүд шангай хоёрдохи һуурида гараа. Тэдэ финалда пеналь­ти үдьхэлһэнэй удаа Рубцовск хотын командада шүүгдээ.

Новоселенгинск болон Түнхэн һууринуудай басагадай команданууд 6-дахи һуури эзэлээ.

Даам наадалга

Братск (Эрхүү можо). Буряадай үхибүүд Сибириин федеральна той­рогой мүрысөөнһөө 12 медаль гэр­тээ асарба. 2009 оной хүүгэдэй дун­да Хэжэнгэ аймагай Бадма-Доржо Бадмацыренов классическа даам наадалгада түрүүлжэ гараа. Улаан- Үдэ хотын 32-дохи һургуулиин шаби Елизавета Суворова тус мүрысөөндэ хоёр алтан медаль абажа шадаа. Тон иимэ амжалта Настя Мадасова туйлаһан байна. Елизавета болон Настя хоёр түргэн даам наадахадаа шалгараа.