​Хүсөөд ерэһэн хүрэл шан

Олимпиин нааданай абарга бүхэ Артур Таймазов (Үзбек Улас) ба мүнгэн медальда хүртэһэн Василий Федори­шин (Украин Улас) хоёр допинг хэрэглэһэнэй түлөө медальнуудаа хасуулха баатай болобо гэһэн ха­туу шиидхэбэри Уласхоорондын Олимпиин хороон гаргаба.

Бээжэндэ үнгэрһэн Олимпиин нааданда 60 кг шэгнүүртэ Ородой Холбоото Уласай барилдаашан Мав­лет Батыров түрүүлээ һэн, харин 2-дохи һуури Василий Федоришин эзэлээ. 3-дахи һуурида Японой бүхэ Кеничи Юмото, 5-дахи һуурида Кыр­гыз Уласые түлөөлһэн манай Базар Базаргуруев гараа бэлэй.

Һэргээшэтэй (допингтой) байһан гэжэ элирүүлэгдэжэ, нэрэ солоёо татан буулгуулһан Василий Федо­ришинай мүнгэн медаль Японой тамиршанда үгтэхэ болобо, харин Кеничи Юмотын хүрэл медаль Базар Базаргуруевта хүртэбэ бшуу.

Агын Буряадай тойрогой Шулуу­та нютагай сүлөөтэ барилдаанай та­миршан Базар Базаргуруев болбол Буряад Уласай барилдаанай түүхэдэ анха түрүүшын Олимпиин нааданай медальтан болобо.

Базар Базаргуруевай түрүүшын һоригшо Бата Базаров юм. Агаһаа Улаан-Үдэ хото оюутан боложо ерэһэн Базар хадаа Фёдор Махутовай барилдаанай һургуулида ороһон юм.

Спортын “Номто” клубай эдэбхи үүсхэлээр Кыргыз Уласай суглуулаг­дамал командын бүридэлдэ орожо барилдаха эрхэдэ хүртэһэн. “Ном­тын” эмхидхэн байгуулагша Вале­рий Доржиев ба Жамса Лхамажапов гэгшэд Олимпиин нааданда Базарые бэлдэжэ шадаа.

Кыргыз Уласай Бишкек хотоһоо ехэ һайн мэдээсэл дуулгаба. Юуб гэхэдэ, Базар Базаргуруевай амжал­таар кыргыз улад туйлай ехэ омо­горхожо байна. Тиигэжэ энэ ороной Засагай газарай хэблэлэй албанай мэдээгээр, Базар Базаргуруевта 60 000 доллар, Жамса Лхамажаповта 15 000 доллар шан барюулагдаха гэнэ.

Олимпиин нааданай медаль эзэ­нээ оложо, Базар Базаргуруевай эн­гэртэ толорхо болоод, буряад ара­дайшье һүлдэ үргэгдэбэ ха юм.