​Спортын тобшо һонинууд

Шатар

Таиланд. Уласхоорондын гросс­мейстер Антон Шомоев Таиландда уласхоорондын томо мүрысөөндэ амжалтатайгаар хабаадажа ерэбэ.

Эндэ хабаадаһан 150 шатаршадай дунда Буряадай тамиршан шангай гурбадахи һуури эзэлбэ. Антон Шо­моевтой адли 7 очко үшөө дүрбэн шатар­ша абаа. Англи­ин суу­та ша­таршан Найджел Шорт 7,5 очко­тойгоор түрүүлһэн бай­на.

Бокс

Москвагай можо. Эхэнэрнүүдэй дунда Ородой чемпионадта Буряа­даймнай тамиршад хоёр мүнгэн ме­дальда хүртэбэд.

Москвагай можын Покров­ское һууринда үнгэргэгдэһэн энэ мүрысөөндэ Ородой можо нютагуу­дай 167 боксёрнууд хабаадаа.

60 килограмм хүрэтэр шэгнүүртэ Наталья Шадрина финальна уул­залгада 2016 оной Олимпиадын хүрэл медаль хүртэгшэ Анастасия Беляковада шүүгдэбэ. 75 килограмм хүрэтэр шэгнүүртэ Дарима Сандако­ва мэдээжэ боксёр Ярослава Якушинада булигдаа.

Сагаалса буудалга

Белгород. Июль һарада Турциин Самсун хотодо үнгэргэгдэхэ шэхэ ха­туушуулай дунда Сурдлимпиин на­адануудта Буряадай хоёр тамиршан хабаадаха эрхэдэ хүртэбэ.

Белгород хотодо үнгэргэгдэһэн шэлэн абалгын Ородой чемпио­надта Анатолий Гаськов болон Цы­пелма Намдакова гэгшэд чемпио­нуудай нэрэ зэргэдэ хүртөө. Тэдэ пневматическа винтовкоор бууда­даг юм.

Бага футбол

Новосибирск. “Бага футбол – дээдэ һургуулинуудта” гэһэн Бүхэроссиин түсэлэй Сибириин той­рогтохи шата амаралтын үдэрнүүдтэ түгэсэбэ.

Эхэнэрнүүдэй дунда манай ула­сые Буряадай гүрэнэй университе­дэй басагад түлөөлжэ, шангай гур­бадахи һуури эзэлһэн байна. Хүрэл медаль эзэлхын түлөө тэдэ Томск хо­тын университедэй тамиршадые 3:0 гэһэн тоотойгоор илаба. Түрүүшын һууринуудта Красноярск болон Но­восибирск хотонуудай команданууд гараа.

Гиир үргэлгэ

Ород гүрэнэй Азиин талын чем­пионадта Буряадай гурбан тамир­шан шалгаржа, шангай һууринуудые эзэлбэ.

Андрей Рассадин өөрынгөө шэгнүүртэ мүнгэн медаль абажа ша­даа. Сергей Каргин болон Василий Недорезов гэгшэд гурбадахи һуури эзэлээ.