​Владимир Путинда зорюулагдаа

Апрелиин 23-да анха түрүүшынхиеэ Бэеын та­мирай-спортын ордондо бүхэ барилдаагаар мүрысөөн болобо. Энэ хэмжээ ябуулга Сагаан Дара Эхэдэ зорюулагдаһан байна. Гэхэтэй хамта, Ород гүрэнэй Юрэнхылэгшэ Владимир Владимирович Пути­най бэе тамирай элүүр мэндын, ажал хэрэгэйнь урагша­тай байхын түлөө барилдаан болобо гээд хэлэхэ шухала.

Нээлгын баяр ёһололой үедэ Буддын шажанай заншалта Сангхын Бан­дида хамба лама Дам­ба Аюшеев танхимаар дүүрэн сугларһан хүн зон­до мүрысөөнэй удха ша­нар тухай хөөрэжэ үгэбэ. Тэрэ арбан жэлэй туршада таһалгаряагүй энэ мүрысөө эмхидхэжэ байһандаа ехэ баяртай байһанаа мэдүүлээ.

- 250 жэлэй урда Елизаве­та Петровна хатанай ашаар Буддын шажан Буряадта хуулита болоһон юм. Мүн Агууехэ 2 дугаар Екатери­на хатан Буддын шажанай Бандида хамба ламанарай институт байгуулаа. Бидэ мүнөө гүрэнэй Юрэнхылэг­шэ Владимир Владимирович Путинай элүүр энхын түлөө бүхэ барилдааша хүбүүдые суглуулаад, Очирвани бурха­наа баярлуулжа байнабди, - гэжэ Дамба Аюшеев хэлэһэн байна.

Буряад Уласай Толгойлог­шын уялга дүүргэгшэ Алек­сей Цыденов энэ хэмжээ ябуулгын удха шанар тон ехэ гэжэ тэмдэглээ.

- Бандида хамба лама Дамба Аюшеевэй аша­ар тус мүрысөөн боло­жо байна гээшэ. Буряад ёһо заншалаа һэргээжэ, үргэжэ байһандань баярые хүргэмөөр, - гэжэ Алексей Цыденов хэлээ.

Арбадахияа үнгэргэгдэжэ байһан энэ мүрысөөндэ 1300 тамиршад хабаадаба. Тэдэ Буддын шажанай заншалта Сангхын бүхы дасануудые түлөөлһэн байна. Заншал­та ёһоороо мүрысөөндэ эдиршүүл болон ехэшүүл ха­баадаа. Тэдэнэй тоодо манай мэдээжэ барилдаашад бай­гаа. Нээлгын баяр ёһололой үедэ түрүү 20 барилдаашад­та үнэтэ бэлэгүүд барюулаг­даа.

Мүрысөөнэй гурбан хи­бэс дээрэ шанга тулалдаа­нууд болобо. Тиигэжэ 2005 ондо түрэһэн, мүнөө 12 наһа гүйсэжэ ябаһан хүбүүдэй дунда Агын дасанай түлөөлэгшэ Цырен Дарижа­пов түрүүлжэ гараа.

Хурамхаанай дасанай Тамир Дмитриев болон Хэ­жэнгын дасанай Батор Цы­денжапов гэгшэд шангай һууринуудые эзэлбэ.

Үхибүүд шэгнүүрэй ёһоор, 9 бүлэгтэ хубааран барилдаба. Өөр өөрынгөө шэгнүүртэ хэд илажа гарааб гэхэдэ, Данзан Ванданов (Чи­саанын дасан), Агван Жарга­лов (Санагын дасан), Баярто Базаров (Хэжэнгын дасан), Жаргал Баендуев (Баргажа­най дасан), Борис Даржаев (Санагын дасан), Арсалан Данжаев (Загастайн дасан), Баир Будажапов (Анаагай дасан), Никита Жаргалов (“Балдан Брэйбун”дасан) болон Ондар Тогтуш (Тыва Улас) гэгшэд болоно.

Ехэшүүлэй дунда һонирхолтой барилдаан болоо. Тиигэжэ 63 килограмм хүрэтэр шэгнүүртэ Барга­жанай дасанай Баясхалан Очиров һүүлшын уулзалгада Хурамхаанай дасанай Алек­сей Раднаевай нюргыень шоройдуулаа. Эндэ шангай гурбадахи һуури Сээжэ Бур­галтайн дасанай Солбон Рад­наев эзэлээ.

75 килограмм хүрэтэр шэгнүүртэ Хурамхаанай да­санай түлөөлэгшэ, мэдээжэ барилдаашан Артем Раднаев түрүүлһэн байна. “Хамбын хүреэ” дасанай Баясхалан Гомбоев болон Сартуул Бу­лагай дасанай Бато-Жаргал Банзаракцаев гэгшэд шан­гай һууринуудта гараа.

75 килограммһаа дээшэ шэгнүүртэй барилдааша­дай дунда Сээжэ Бургалтайн дасанай түлөөлэгшэ Рин­чин Санжиев чемпионой нэрэ зэргэдэ хүртөө. Дүрбэн бүхэшүүлэй тоодо орохын түлөө тулалдаанда тэрэ Агын суута бүхэ Цыбик Мак­саровые унагааһан байна. Шангай хоёрдохи һуури Хэ­жэнгын дасанай Баин Жим­беев эзэлээ. Хурамхаанай дасанай Владимир Гатапов гурбадахи һуурида гараба.

Шанга барилдаан үдэшын 23 саг болотор үргэлжэлөө. Орой болобошье, харагшад үлэжэ, лотерей нааданда хабаадажа, аза талаантайшуулынь айфон түхэлэй гар утаһа, зураг­та хүргэгшэ, морин эрдэни, бодо мал, хотошо нохойн гүлгэн гэхэ мэтэдэ хүртэбэ.