811
«Буряад үнэн» Хэблэлэй байшанай үнгэргэдэг хүнгэн атлетикээр заншалта эстафетэ апрелиин 30-да эмхидхэгдэбэ. Тус хэмжээ ябуулга 71-дэхиеэ болобо гээд һануулая.
Урда жэлнүүдтэ эстафетэ майн 2-то үнгэргэгдэдэг бэлэй. Мүн баhа ондоо үдэрнүүдтэ болодог байhыень түүхын хуудаһанууд гэршэлнэ. 2017 ондо майн 2 ажалай үдэр гэжэ тоологдоһонһоо боложо, эмхидхэгшэд тамиршадые нэгэ бага урид суглуулха гэжэ тон зүб шиидхэбэри абаа гээд хэлэлтэй.
Хорёод жэлдэ мүрысөөнэй ахамад шүүгшэ байһан Надежда Николаевна Суворовагай хэлэһээр, жэл бүри майн 2-то юундэб даа хүйтэрдэг гээшэ.
- Үшөө оюутан байхадаа буулгаһан нэгэ гэрэл зураг мүнөөшье болотор оюутадтаа харуулдагби. Тэрэ зураг дээрэ “Буряад үнэн” сониной мүрысөөндэ гүйжэ байһамнай буулгагданхай. Һонирхолтойнь гэхэдэ, тиихэдэ саһанай орожо байхада, бидэ мүрысөө һэмди. Соведүүдэй талмай дээрэ гүйһэн хүбүүд, басагад заал һаа спортын нимгэн хубсаһа (футболко, богони үмдэн) үмдөөд байха ёһотой бэлэйбди. Харин харагшадай булта бээлэй, малгай, дулаан дэгэл үмдөөд байдагыень һайн һананаб. Бусадшье жэлнүүдтэ хүйтэн уларилай үедэ мүрысөөн болоһон юм, - гэжэ Надежда Николаевна хөөрэнэ.
Бидэшье, тус мүрысөө 20 гаран жэлэй туршада эмхидхэжэ байгшад, иимэ ушартай нэгэтэ бэшэ дайралдаабди. 2000 онһоо хойшо хоёр дахин эстафетын үнгэргэгдэхэ үдэр һэлгэгдээ.
Буряад Уласай Спортын болон залуушуулай бодолгын яаманай сайдай орлогшо Дмитрий Штепа мүрысөөндэ хабаадагшадта хандахадаа, тус мүрысөөндэ манай урдаа хараха тамиршад хабаададаг байһан юм гэжэ хэлээ.
- Буряадтамнай олон бэрхэ хүнгэн атледүүд ургажа гараа. Тэдэ үшөө һургуулиин шабинар, оюутад ябахадаа, энэ эстафетэдэ хабаадажа, ехэ спортдо түрүүшынгээ алхамуудые хэһэн байна. Тиимэһээ танайшье дунда манай хүнгэн атлетикын ерээдүй байна ёһотой. Булта һайн дүн харуулха байха гээд найданабди, - гэжэ Дмитрий Штепа сугларагшадые амаршалаа.
“Буряад үнэн” Хэблэлэй байшанай захирал Баяр Дашеевич Балданов тамиршадта баярай һайхан үгэнүүдые хэлэжэ, һайн дүнгүүдые харуулхыень уряалба.
71-дэхи эстафетэдэ хамта дээрээ 650 хүн хабаадаа. Зарим хүнүүдэй һанамжаар, тус хэмжээ ябуулга тон олон тамиршадые суглуулна. Харин эмхидхэгшэдэй тэмдэглэһээр, жэл бүри хабаадагшадай тоо үсөөрнэ. Мүнөө жэлэй энэ тоо урда жэлнүүдэй мүрысөөнүүдэйхиһээ доогуур байна. Юундэб гэхэдэ, зарим жэлнүүдтэ 1500- 2000 хүнүүд Улаан-Үдын үйлсэнүүдээр гүйлдэдэг бэлэй.
Хэды тиигэбэшье, хэмжээ ябуулгада урдаа хараха ургажа ябаа олон тамиршад хабаадаа гээд хэлэлтэй. Тэрэ тоодо Ород гүрэнэй суглуулагдамал командын гэшүүн Николай Вербицкий гэгшые нэрлэмээр. Мүн тиихэдэ боксоор Европын чемпион болоһон Людмила Воронцова мүрысөөндэ хабаадалсаа.
Мүнөө жэлэй эстафетын 10 шата Соведүүдэй талмай дээрэһээ эхи абажа, Илалтын проспектээр үргэлжэлэлөө. Хабаадагшад фиништэ Соведүүдэй талмайда бусаа.
Түрүүшын урилдаанда оройдоол табан команда хабаадаа. Эдэмнай юһэн жэлэй һургуулинуудай хүбүүд болон басагад болоно. Эрэмдэг бэетэй хүүгэдэй коррекционно тусхай һургуулинууд эндэ гүйлдэхэ байһан аад, нэгэнииньшье мүрысөөндэ хабаадабагүй. Тиигэжэ 28 дугаар санаторно һургуулиин үхибүүд хоёр хоёрдохи һуури эзэлээ. 31 дүгээр һургуулиин команданууд хүбүүдэй болон басагадай дунда шалгаржа, хоёр Кубогта хүртэбэ. Илаһан бүхы команданууд амтатай торт бэлэгтэ хүртөө.
Удаадахи урилдаануудай түрүүшын шатада түрүүлһэн тамиршадта Буряад Уласай Спортын болон залуушуулай бодолгын яаманай тусхай мүнгэн шангууд барюулагдаа. Һургуулиин үхибүүдэй дунда 25 дугаар һургуулиин Наталья Иванова болон 22 дугаар интернат һургуулиин Илья Полевик гэгшэд түрүү һууринуудые эзэлээ. Наталья хадаа үшөө 8-дахи классһаа манай эстафетэдэ амжалтатайгаар хабаадана гээшэ. Энэ басаганай шүүхэдэ, хэншье гайхаагүй. Хүбүүдэй дунда түрүүлһэн Илья Полевик Буряад Уласта мэдээжэ санашан юм. Эндэ үшөө хүнгэн атлетикээр бэеэ һоридог байһанаа харуулаа. Тэрэ урилдаанай һүүлшын метрдэ нэгэдэхи һуурида гаража шадаа. Уласай олон шэглэлтэй колледжын оюутан Анна Ксенофонтова болон Буряадай гүрэнэй университедэй Евгений Расщивалов гэгшэд хоёр тусхай шанда хүртөө. Эдэ хоёр Буряад Уласай урдаа хараха хүнгэн атледүүд болоно. Бүхы һоригшод болон спортдо дуратайшуул эдэ хоёрто ехэтэ найдажа байдаг бшуу.
Хоёрдохи болон гурбадахи урилдаануудта дунда һургуулинуудай басагад ба хүбүүд гүйлдөө. Эндэ 26 хүбүүдэй болон 24 басагадай команданууд мүрысөөндэ гараа. 42 дугаар һургуулиин шабинар ялас гэмэ амжалта туйлаба. Тэдэнэй хоёр команда түрүүлжэ гараа. 32 дугаар һургуулиин басагад болон 49 дүгээр һургуулиин хүбүүд хоёрдохи һууринуудые эзэлээ. 65 дугаар болон 51 дүгээр һургуулиин команданууд гурбадахи шангай һуурида гараа.
Һүүлшын шатада эхэнэрнүүд болон эрэшүүл сугтаа гүйбэ. Иимэ ушар түрүүшынхиеэ тохёолдобо. Энэ хадаа командануудай үсөөн байһанһаа уламжалаа. Урда жэлнүүдтэ мүрысөөнэй һүүлшын шатын эхиндэ 20-30 хүнүүдэй жэрылдэжэ байдагые һанаһан үндэр наһатай һоригшод, спортдо дуратайшуул нюдэнэйнгөө нёлбоһо аалиханаар аршана. Эндэ Буряадай гүрэнэй университедэй хоёр команда, Буряад Уласай багшанарай колледжын хүбүүд, уласай олон шэглэлтэй колледжын басагад болон Дивизионнодо алба хаадаг танкова бригадын эрэшүүл өөр өөрынгөө бүлэгүүдтэ түрүү һууринуудые эзэлһэн байна.
Иигээд лэ 71-дэхи эстафетэ түүхэдэ оробо. Энэ хэмжээ ябуулгые нэгэ бага ондоо болгохо хэрэгтэй гэжэ һанагдана.
Һургуулинуудай дунда урилдаанай үедэ
Буряадай гүрэнэй ехэ һургуулиин тамиршадые шагналгын үедэ
Илагшадта грамотанууд, Кубогууд болон тусхай шангууд барюулагдаа
Герман Намжиловай, Артём Федотовой болон Борис Балдановай зурагууд
Автор: Борис БАЛДАНОВ
