​Спортын тобшо һонинууд

Кикбоксинг 

Калининград. “Фул-контакт с лоу-кик” гэжэ кикбоксингын эгээл хүндэтэй шэглэлээр Ород гүрэн дотор түрүү һуури эзэлхын түлөө мүрысөөн амаралтын үдэрнүүдтэ түгэсэбэ. Эндэ 40 гаран можо, хизаарнуудай 300 гаран тамиршад суглараа. Буряад Уласые Влад Буянтуев ори гансаараа түлөөлһэн байна. Үшөө 19 наһа хүрөөдүй энэ тамиршан 57 килограмм хүрэтэр шэгнүүртэ шангай гурбадахи һуури эзэлжэ шадаа. Тус амжалта туйлаһан Влад Буянтуев Ород гүрэнэй суглуулагдамал командын бүридэлдэ оруулагдажа, Европын чемпионадта хабаадаха эрхэдэ хүртэбэ. 

Бокс 

Кемерово. Бүхэдэлхэйн боксын бүлгэмэй (WSB) командна мүрысөөнэй финалай дүрбэнэй нэгэдэхи шата эхилбэ. Бүлэг соогоо 2-дохи һуурида гараһан Ородой “Patriot Boxing Team” командын бүридэлдэ Буряадаймнай Батор Сагалуев оруулагдаа. Командна мүрысөөн хадаа 7-дохи жэлээ үнгэргэгдэнэ гэжэ хэлэхэ шухала. Казахстанай “Astana Arlans Kazakhstan” гэһэн команда хоёр дахин чемпион болоhон байна. Тэдэ шангай һууринуудые дүрбэ дахин эзэлһэн юм. Тиимэһээ мүрысөөнэй эгээл суутай командатай Ородой боксёрнууд тус шатада шаасалдаха болобо. Батор Сагалуев 49 килограмм хүрэтэр шэгнүүртэ өөрынгөө уулзалгада илалта туйлаа. Удаадахи уулзалгануудта Ородой тамиршад Максим Чернышев, Алексей Мазур болон Андрей Ковальчук гэгшэд шүүгдэһэн байна. Илья Квасниковай һүүлшын тулалдаанда булижа гарабашье, Ородой тамиршад 2:3 гэһэн тоотойгоор шүүгдэбэ. Апрелиин 20-до Караганда хотодо эдэ команданууд дахин уулзаха. Тэндэ шүүһэн команда удаадахи шатада гараха юм. 

Футбол 

Улаан-Үдэ. Һайн дуранай командануудай дунда Ород гүрэнэй чемпионат эхилбэ. Тус мүрысөөнэй “Сибирь” бүлэгтэ “Бурятия” команда наадана гээд һануулая. Майн 9-дэ “Бурятия” өөрынгөө талмай дээрэ Новосибирск хотын “Сибирь-М” командые хүлеэн абаа. Энэ нааданда айлшад һайн наада харуулжа, 3:1 гэһэн тоотойгоор илаба. Алексей Рябовонов Новосибирскын командын бартаа руу оройдоол нэгэ бүмбэгэ оруулжа шадаа. Мүнөө үедэ манай футболистнууд 10 командын дунда 9-дэхи һуури эзэлнэ. Гурбан очкотой табан команда түрүүлжэ ябанад. Удаадахи хоёр наадые “Бурятия” команда Новокузнецк болон Междуреченск хотонуудта үнгэргэхэ. Сибириин Кубогта хүртэхын түлөө мүрысөөнэй финалай дүрбэнэй нэгэдэхи шатада Красноярск хотын “Енисей-М” командатай июниин 14- дэ, июлиин 7-до “Бурятия” наадаха гэжэ эмхидхэгшэд мэдээсэнэ. 

Тайска бокс 

Эрхүү. 

Ород гүрэнэй зүүн хоёр тойрогой чемпионат Байгал далайн баруун талада оршодог Эрхүү хотодо гурбан үдэрэй туршада үнгэргэгдэбэ. Тус мүрысөөндэ Буряадай тамиршад олоороо хабаадаба. Бүхы дээрээ 10 медаль абаа. Тиигэбэшье Буряадай суглуулагдамал команда гурбадахи һуури эзэлээ. Түрүү һууринуудые Павел Леонтьев, Бато Бадархаев, Саян Арамхиев гэгшэд эзэлээ. Ольга Бардунаева, Арсалан Харанохоев, Денис Истомин, Владимир Фролов, Максим Гаськов гэгшэд мүнгэн медальнуудаар шагнагдаа. Шангай гурбадахи һуурида Жанат Шуинов болон Жаргал Жигжитов гэгшэд гараба. Тэдэ булта Ород гүрэнэй чемпионадта хабаадаха эрхэдэ хүртөө.