​Спортын тобшо һонинууд

 Һур харбаан 

Льгов (Курска можо). Буряад Уласай тамиршад анха түрүүшынхиеэ 3D һур харбаанай мүрысөөндэ хабаадаба. Тиигэбэшье тэдэ һайн үрэ дүнтэй ерээ. Буряад, Хальмаг Уласуудай, Ставропольско, Үбэр Байгалай хизаарнуудай, Омско, Псковско можонуудай, Санкт- Петербург хотын 23 тамиршан хоёр зүйлөөр мүрысэһэн байна. Тэдэ ойн талмайда 25 метр зайһаа ан амитадай дүрсэ харбаа. Түрүүшын шатада хэн оло дахин тудахаб гэжэ мүрысөө. Хоёрдохи шатада нэгэ минутын хугасаа соо хэн эгээл оло дахин тудааб гэжэ элирүүлэгдээ. Эрэшүүлэй дунда Сэлэнгэ аймагай Олег Цыбикжапов шангай хоёрдохи һуури эзэлээ. Эхэнэрнүүдэй дунда Түнхэн аймагай һоригшо Сэсэг Доржиева алтан болон хүрэл медальнуудта хүртөө. Хэжэнгэ һууринай һоригшо Сэсэгма Пинтаева шангай гурбадахи һуурида гараа. Олег Цыбикжапов, Сэсэг Доржиева гэгшэд Ород гүрэнэй суглуулагдамал командын бүридэлдэ оруулагдаа. Августын 12-15-ай үдэрнүүдтэ Ульяновск хотодо үнгэргэгдэхэ СНГ-гэй бүридэлдэ ородог гүрэнүүдэй дунда спортын арадай зүйлнүүдээр нааданда тэдэ хабаадаха болобо. 

Самбо

Минск. Самбо барилдаагаар Буряад ороной тамиршан Анна Щербакова Европын чемпионадта шангай гурбадахи һуури эзэлбэ. Анна Щербакова энэ мүрысөөндэ 64 килограмм хүрэтэр шэгнүүртэ хибэс дээрэ гараа. Чемпион боложо тодорһон Белоруссиин тамиршан Татьяна Мацко гэгшэдэ тэрэ шүүгдэжэ, гурбадахи һуури эзэлээ. Анна хадаа 2015 ондо Европын түрүүшын наадануудта гурбадахи һуури эзэлһэн юм. Тэрэл жэлдээ Мароккодо дэл-хэйн абарга болоо бэлэй. Минск хотодо Европын чемпионадта хабаадахаяа 29 гүрэнэй 300 гаран самбистнууд ерээ.

Футбол 

Кемеровскэ можо. Һайн дуранай командануудай дунда Ород гүрэнэй чемпионадта хабаададаг “Бурятия” команда Кемеровскэ можодо хоёр наада үнгэргэхэдөө, бирагүйдэбэ. Новокузнецк хотодо “Бурятия” бартаа руугаа аяар 8 бүмбэгэ алдаба. Мүн Междуреченскдэ “Распадская” командада 1:3 гэһэн тоотойгоор шүүгдээ. Мүрысөөндэ хабаадаhан 10 командануудай дунда “Бурятия” һүүлшын һуури эзэлнэ. Новокузнецкын футболистнууд гурбан нааданда 9 очко абажа, түрүү һуурида ябана. Майн 26-да “Бурятия” өөрынгөө талмай дээрэ Эрхүү хотын “Зенит-М” командатай наадаха юм. Манай хүршэнэр хоёр нааданда очко абажа шадаагүй юм