990
Ородой Холбоото Уласай сүлөөтэ барилдаагаар чемпионат Ингушетиин Назрань хотодо июниин 12-14-нэй үдэрнүүдтэ үнгэргэгдэхэ.
25-дахияа үнгэргэгдэжэ байһан чемпионат Ингушети Уласай байгуулагдаһаар 25 жэлэй ойн баярта дашарамдуулагдана. Абарга хүсэтэй тамиршадай мүрысөөн 20-дахи зуун жэлэй эхиндэ мэдээжэ барилдаашан байһан Берд Евлоевэй нэрэмжэтэ тамирай ордондо үнгэргэгдэхэ юм. Энэ ордон 2016 ондо Федеральна программын хүсөөр баригдаһан байна.
Буряад Уласаа юһэнһөө үсөөн бэшэ тамиршад түлөөлхэ юм. Эдэ хэд бэ гэхэдэ, Балдан Цыжипов, Андрей Гатаулин, Булат Батоев, Баяр Цыренов, Алексей Боровицкий, Эрдэм Будажанаев, Евгений Жербаев, Алексей Сабидаев, Цыбик Максаров гэгшэд болоно.
Арсалан Будажапов Даша Шарастепанов хоёр гэмэлтэһэнһээ боложо, энэ мүрысөөндэ хабаадахагүй. Юрий Власко Европын чемпионадта хабаадахаар хараалагдана. Энэнь Ородой Холбоото Уласай залуушуулай суглуулагдамал командын ахамад һоригшо Магомед Азизовай шиидхэбэриһээ дулдыдаха юм.
Ородой Холбоото Уласай чемпионадта тамиршадай хабаадахын тула Буряад Уласай спортын болон залуушуулай бодолгын талаар яаман 1245000 мянган түхэриг мүнгэ һомолбо.
