801
2017 оной июниин 27-һоо июлиин 1 болотор Улаан-Үдэдэ тамирай-спортын байшанда боксёр Велингтон Баранниковай дурасхаалда зорюулагдаһан Бүхэроссиин турнир үнгэргэгдэхэ юм.
Буряад Уласай Хүндэтэ эрхэтэн, суута тамиршан, СССР-эй габьяата спортын мастер, 1964 ондо Токио хотодо үнгэргэгдэһэн Олимпиин наадануудта мүнгэн медальда хүртэһэн, Европын чемпион Велингтон Баранниковай дурасхаалда зорюулагдаһан Бүхэроссиин турнирта Ородой Холбоото Уласай можо нютагуудай болон хари гүрэнүүдэй боксёрнууд хабаадаха юм. Москва хотоһоо, Эрхүү, Новосибирск, Кемерово, Томск, Амурск, Москвагай, Кострома, Ростов, Рязань, Омск, Свердловск можонуудһаа, Үбэр Байгалай, Красноярска, Приморско, Хабаровска хизаарнуудай, Саха (Яхад), Хакаси, Тыва уласуудай, Ханты-Мансийск, Ямало-Ненецк автономно тойрогуудай эгээл шанга тамиршад энэ турнирта мүрысэхэ юм. Тиихэдэ Монгол, Хитад, Польшо гүрэнүүдэй боксёрнууд ерэжэ, энэ мүрысөөндэ хаба шадалаа туршаха юм.
Бүхэроссиин турнирта 1998-1977 онуудой болон аха зон спортын мастерта кандидат гэһэн нэрэ зэргэтэй тамиршад хабаадаха аргатай. Эрэшүүл арбан, эхэнэрнүүд гурбан шэгнүүртэ мүрысэхэ.
Июниин 27-до турнир нээлгын баяр ёһолол үнгэргэгдэжэ, июниин 28 –һаа мүрысөөн эхилжэ, июлиин 1-дэ түгэсэхэ. Мүрысөөнэй үдэрнүүдтэ үглөөнэй 8-һаа 9 болотор тамиршад бэеэ шэгнэхэ юм. Удаань июниин 28-да үдэрэй 15 сагһаа, июниин 29-30-най үдэрнүүдтэ үдэрэй 14 сагһаа, июлиин 1-дэ үдэрэй 12 сагһаа хойшо боксёрнууд хаба шадалаа туршалсаха юм.
Июлиин 1-дэ түгэсхэлэй шата үнгэргэгдэхэ.
Герман Намжиловай гэрэл зураг.
