​Хибэсэй эзэд бултаниие шүүгээ

Дайшалхы самбо барилдаагаар бүхэроссиин мүрысөөн Улаан-Үдэдэ үнгэрһэн долоон хоногой эсэстэ боложо түгэсэбэ. Тус хэмжээ ябуулгада Буряадай тамиршад бүхы 9 алтан медаль абажа шадаа. 

Бүхэроссиин мүрысөөн гурбадахи жэлээ эмхидхэгдэжэ, илалта туйлаһан тамиршадта “Ородой Холбооной спортын мастер” гэһэн нэрэ зэргэдэ хүртэхэ арга боломжо олгогдоно. “Кречет” гэһэн ОМОН-ой сэрэгшэдэй албанайнгаа уялгануудые дүүргэхэ үедөө баатарлиг үхэлөөр унаһанай мүнхэ дурасхаалда зорюулагдажа, энэ мүрысөөн 22 жэлэй саада тээ эмхидхэгдэжэ эхилээ. 

Буряадай ОМОН 1993 ондо байгуулагдаа бэлэй. Тэрэ гэһээр, тэрэнэй түлөөлэгшэд аяар 43 дахин албанай хэрэгээр Хойто Кавказ ошоһон түүхэтэй. Энэ хугасаада 547 алба хаагшад гүрэнэй шагналнуудые абаа. Һүүлэй байдалаар, 11 хүн алдалан унаhан байна. Эдэнэй мүнхэ дурасхаалые энэ үдэр хүндэлэн ёһолно. 

Улаан-Үдэ хотын мэр Александр Голков сугларагшадые амаршалха зуураа, Буряадай самбо барилдаанай федерациин хүтэлбэрилэгшэ Бадма-Доржо Жигжитовта “Улаан-Үдын 350 жэл” гэһэн медаль зүүлгэбэ. Бадма-Доржо Жигжитов үгэ хэлэхэдээ, самбо барилдаан манай уласта нилээд хүгжэжэ байна гэжэ тэмдэглээ. 

- Мүнөө үедэ “Самбо барилдаанай һургуулинуудта” гэһэн бүхэроссиин түсэл үргэнөөр нэбтэрүүлэгдэнэ. Энэ хэрэгые Буряад Уласай Засагай газар дэмжэжэ, һаяын үдэрнүүдтэ 14 хибэс абахань. Тэдэнииень сентябрь соо тараахабди, - гэжэ Бадма-Доржо Жигжитов мэдүүлбэ. 

Мүнөө жэлэй мүрысөөндэ федеральна гурбан тойрогой долоон можо нютагуудай тамиршад Улаан-Үдын хибэс дээрэ гараа. 

52 килограмм хүрэтэр шэгнүүртэ Буряадай тамиршан Эрдэм Абарзадиев Новосибирскын тамиршаниие бахалуурдажа, илалта туйлаа. 57 килограмм шэгнүүртэ Мэргэн Гармажапов түрүүлжэ гараа. Мэргэн шүүгдэжэ байтараа, нүгөөдынгөө гарыень мушхажа шадаа. Иигэжэ тэрэ чемпионой нэрэ зэргэдэ хүртэбэ. 

2015 оной дэлхэйн абарга Андрей Будажапов Баир Жамсаранжаповые илажа, алтан медаль абаба. Бага шэгнүүртэ барилдаһан Артем Раднаев Жаргал Жигжитовые булиһан байна. 

Хэжэнгэһээ уг гарбалтай ОМОН-ой сэрэгшэ Чингис Санданов Хабаровскын тамиршаниие шүүжэ, спортын мастер болобо. Энэ мүрысөөндэ Чингис “Эрхим тамиршан” гэжэ тодороо. 

82 килограммай шэгнүүртэ Петр Михеев Эрхүү хотын тамиршаниие шүүжэ гараа. Удаань Андрей Баранов Буряадай тамиршадай шанга байһые гэршэлээ. 

Буряад Уласай соло холо ойгуур дуудуулһан наһатай тамиршад энэ мүрысөөндэ хабаадажа шэмэглээ. 2006 оной дэлхэйн абарга Дамба Раднаев түрүү һуури эзэлээ. 2006- 2007 онуудта Европодо шалгарһан Галсан Бадмацыренов болон Владимир Дамдинов гэгшэд бэе бэетэеэ уулзажа, һонирхолтой тулалдаа харуулаа. Эндэ Галсан диилэһэн байна. 

Мүрысөө нээлгын ёһололой үедэ

Борис Балдановай гэрэл зурагууд