826
Ородой Холбоото Уласай можо нютагуудта, тэрэнэй тоодо Буряад Уласта, июниин 24-дэ Пхенчан хотодо 2018 ондо эмхидхэгдэхэ 23-дахи Олимпиин үбэлэй наадануудта зорюулагдаһан тамирай хэмжээ ябуулганууд үнгэргэгдэхэ юм.
Олимпиин наадануудые болон тэрэнэй түүхэ дэлгэрүүлхэ гэһэн зорилготой Бүхэроссиин олимпиин наадануудай үдэр эмхидхэгдэдэг юм. Тиихэдээ Ородой Холбоото Уласай можо нютагуудта олон зоной хабаадалгатай тамирай хэмжээ ябуулга, үндэһэтэнэй тамирай нааданууд үнгэргэгдэдэг.
Буряад Уласай Түбэй стадион дээрэ июниин 24-дэ эрэмдэг бэетэй зоной дунда һур харбалгаар Ородой Холбоото Уласай чемпионат эмхидхэгдэхэ.
Буряад Уласай аймагуудай болон Улаан-Үдын тамирай талмайнуудта энэ үдэр футбол, хүнгэн атлетикэ, волейбол, һур харбалга, бүхэ бариилдаан, мори урилдаан, зүг шэг тодорхойлолго, ГТО тушаалга болон бусад тамирай мүрысөөнүүд үнгэргэгдэхэ. Хэжэнгэ, Зэдэ, Баргажан аймагуудта 2017 оной Олимпиин үдэртэ зорюулагдажа, Сурхарбаан наадан эмхидхэгдэхэ юм.
Буряад Уласта эмхидхэгдэхэ Бүхэроссиин олимпиин наадануудай үдэр гэһэн хэмжээ ябуулгада 2012 оной Олимпиин наадануудай эхэнэрнүүдэй барилдаанда хүрэл медальда хүртэгшэ Любовь Волосова, сүлөөтэ барилдаагаар Европын 1-дэхи наадануудай илагша Александр Богомоев, Сурдлимпиин наадануудта илагшад Александр Цоктоев, Григорий Кожевников, Олимпиин наадануудта хабаадагшад Павел Яковлев (хүнгэн атлетикэ), Бальжинима Цыремпилов (һур харбалга), сүлөөтэ барилдаагаар бүхэдэлхэйн, Европын, Азиин чемпион Борис Будаев болон бусад мэдээжэ тамиршад хабаадаха.
“Буряад Уласай Олимпиин Зүблэл” гэһэн Уласай олониитын нэгэдэл, Буряад Уласай Спортын болон залуушуулай бодолгын талаар яаман, Улаан-Үдэ хотын захиргаан, аймагууд, хүүгэдэй тамирай һургуулинууд болон тамирай федерацинууд энэ хэмжээ ябуулга эмхидхэнэ.
