Арад зониие нэгэдүүлһэн Сурхарбаан наадан

Буряад Уласай Толгойлогшын уялгануудые дүүргэгшэ Алексей Цыденов үнгэргэгдэһэн Сурхарбаанда хабаадажа, өөрөөшье үндэһэтэнэй наадануудта хаба шадалаа туршаха дуратай байһанаа мэдүүлээ.

- Би түрүүшынхиеэ сурхарбаанда хабааданаб. Энэ хадаа соёл, тамир хүгжөөлгын болон олон яһатай арад зоной нэгэдэһэн, ёһо заншалаа сахиһан һайндэр болоно. Саашадаа Буряад Уласта энэ найр наадан дэмжэгдэжэл байха, - гэжэ Алексей Цыденов хэлэбэ.

“Наадан-Сурхарбаан-2017” гурбан шатада үнгэргэгдэбэ. Түрүүшын шатада наадан һомоной нютагуудта, удаань Буряад Уласай аймагуудта болон Улаан-Үдэдэ, гурбадахи шатада уласай хэмжээнэй наадан июлиин 1-2-рой үдэрнүүдтэ эмхидхэгдэбэ.

Дээдэ Ивалга нютагта оршодог Ивалгын дасанай ипподромдо найр нааданай нээлгын баяр ёһолол үнгэргэгдэжэ, удаань мори урилдаан болоһон байна.

Улаан-Үдын Түбэй талмай дээрэ бүхэ барилдаан, һур харбаан, шатар, һээр шаалган, шагай наадан болон гиир үргэлгөөр мүрысөөнүүд үнгэргэгдэбэ.

Бүхыдөө тамирай хэмжээ ябуулгануудта 800-һаа дээшэ тамиршад хабаадаа. Командын бүлэгтэ Улаан-Үдын команда түрүү һуури эзэлжэ, кубок болон 150 мянган түхэриг шанда, 2-дохи һуурида – Захаамин аймаг (100 мянган түхэриг), 3-дахи һуурида – Ивалга аймаг (50 мянган түхэриг) шанда хүртэбэ.

Түрүү һуурида гиир үргэлгөөр Сергей Любимский, шатараар – Антон Шомоев, һур харбалгаар Владимир Моглоев (түгэсхэлэй шатада Бальжинима Цыремпиловые илаба), бүхэ барилдаагаар – Хурамхаан аймагай Артём Раднаев гэгшэд хүртэбэ.

Анна Огороднигой гэрэл зураг.

Мори урилдаагаар түрүү һуурида Зэдэ аймагай, 2-дохи – Ярууна аймагай, 3-дахи һуурида – Захаамин аймагай команданууд хүртэбэ. Галина Шойдагбаева, Бадма-Ханда Аюшеева, оперын, эстрадын болон бусад дуушадай хабаадалгатай тоглолто табигдажа, найр наадан дүүрэбэ.

Анна Огороднигой гэрэл зураг.