​Залуушуулай баяр

Буряадай залуу тамиршад Европын хэмжээндэ һайн дүнгүүдые туйлаба: Хорватиин Поречь хотоһоо тэдэ табан медальтай гэртээ бусахань. 

Европын Кубогта хүртэхын түлөө мүрысөөнэй хоёрдохи шата Хорватида июлиин 10-15-най үдэрнүүдтэ боложо түгэсэһэн байна. 32 гүрэнэй 315 тамиршад эндэ хабаадаа гээд хэлэхэ шухала. 

Хубиин тоосоондо ганса Эрдэм Ирдынеев шалгараа. Сэлэнгэ аймагһаа уг гарбалтай энэ тамиршан гурбадахи һуури эзэлхын түлөө тулалдаанда Москва хотын түлөө харбадаг Булат Дугаровые илажа гараа. 

Бусад медальнуудые Буряадай хүбүүд, басагад командна тоосоондо абажа шадаа. Эрдэм Ирдынеев, Булат Дугаров болон Шэтын Эрдэм Должинов гэгшэд финалда Нидерландын залуушуулда 3:5 гэһэн тоотойгоор шүүгдэжэ, мүнгэн медальда хүртэбэд. 

Мүнөө үедэ Москва хотодо һурадаг Найдан Сушкеев Башкортостанай тамиршад Станислав Черемискин болон Надила Рухуула гэгшэдтэй нэгэдэхи һуури эзэлхын түлөө шанга тулалдаанда оройдоол һүүлшын шатада шүүгдэбэ. Великобританиин хүбүүд нэмэлтэ годлинуудаар харбахадаа, манайхинһаа үлүү байба. 

Буряадай Виктория Харитонова, Үбэр Байгалай Туяна Будожапова болон Башкортостанай Элина Шарипова гэгшэд гурбадахи һуури эзэлхэдээ, энэ мүрысөөндэ түрүүлһэн Великобританиин басагадтал шүүгдээ. 

Блочно номо һуршаар харбадаг Буряадай тамиршан Сергей Шенхоров командна микст тоосоондо Москвагай Елизавета Королеватай хамта шангай хоёрдохи һуури эзэлжэ, олон аха дүүнэрээ, һоригшодоо баярлуулба.