Шанга харууһан доро шадал тэнхээгээ арьбадхана

Үдын хойно үхибүүд нойр барижа байгаа. 12 наһанай түлеэ гартаа баринхай сула бэетэй хүбүүхэн лагериие гороолон гүйнэ. Үүдэнэй саанаһаа һоригшонь бултайжа, дүүргэ гэһэн дохёо үгэбэ.

- Унтажа үгэдэггүй, бусадые һэрюулхээр забдаһан үхибүүднай түлеэ баряад гүйдэг юм, - гэжэ Андрей Николаевич Куприянов хажуудань адаглажа байһан намда ойлгуулба.

Үнэхөөрөөшье, журам барихын тула хэһээлтэ заатагүй байха ёһотой гүб даа. Үгы һаа, эдир шамбай тамиршад бэеэ һула табижа болохо. Лагерьта юрэ амархаяа бэшэ, харин һорилгоёо эршэдүүлхэеэ ерээ ха юм. Улаан-Үдэ хотын хүүгэдэй болон эдиршүүлэй уран бүтээлэй байшанай һоригшо Андрей Куприяновай хүтэлбэри доро самбо, дзюдо барилдаагаар бэеэ һоридог багашуул «Сулхарын нуур» гэһэн амаралтын баазада ерэнхэй.

Хүбшэ ой соо, нуурһаа хоёр модоной зайда энэ лагерь оршоно. Талмайнь ехэ үргэн – дураараа гүйхөөр. Үхибүүдэй байрладаг хоёр дабхар модон байшан хуушан, үмхиржэ харлашанхай харагдана. «Һайнаар эдеэлүүлнэ, арайл «hotel» тэрэ тухайшаг гэжэ нэгэнэй гэртэхиндээ хэлэжэ байхые дуулаа һэм»,- гэжэ һоригшонь энеэнэ. Теэд зунай саг хадань яашахаб. Майханууд соошье байрлахаар гүб даа.

Эдир тамиршад үдын урда тээ 2 саг тухай, мүн үдын хойно баһал эды хугасаада бэеэ һорино. Һорилгонууд багашуулда баһал бэрхэтэйшэг ааб даа. Заримашуулынь орой болоһон хойно гэртэхиндээ хонходоод, һорилгоһоо боложо, бэеынгээ «үбдэжэ» байһан тухай мэдүүлнэ. Али нэгэниинь гэртээ бусахааршье бэлэн. Гэбэшье олонхинь һоригшоёо дахажа, лагерьта хэдыдэхиеэ ерээд байна бшуу. Тиимэһээ даданхайнууд.

- Зундаа һорилго хэхэ өөрын байратай болоо һаа гэжэ бодолгото болоноб. Зунай сагта эдир тамиршадтаяа ошохо лагерь бэдэржэ зобошонобди. Мүнөө жэлдэ хоёр халаан Сулхарын эрьедэ үнгэргэбэбди. Ерэхэ жэлдэ Байгал далайһаа холо бэшэхэнэ оршодог нэгэ байшан худалдажа абаха хүсэлтэйб. Тэрэнэй түлөө авто-унаагаа худалдахаар бэлэнби, - гээд һоригшонь дуулгаба.

Урид Андрей Николаевич джип түхэлэй унаатай байһан аад, тамирша басаган шабияа Сибириин ехэ мүрысөөндэ эльгээхэ болоходоо, тэрэ машинаяа худалдаха баатай болоһон юм. Мүнөө тэрэнэйнгээ орондонь абаһан хүнгэн унаагаа дахяа худалдаха болобо. Ажал хэрэгээ ябуулхын тула хубиингаа зөөри гаргашалдаг иимэ хүнүүд тон үсөөн лэ. Үхибүүн бүхэнөө тон һайн мэдэнэ, ямар “агаараар” амилжа ябаһыень бултыень адаглаад байдаг.

Шанга харууһан доро үхибүүд шадал тэнхээгээ нэмээн, сэбэр агаарта сэнгүү һайнаар сагаа үнгэргэнэл даа!