863
Улаан –Үдэдэ Буряад Уласай болон Хитад гүрэнэй олзын хэрэг эрхилэгшэд уулзажа, уласай хүгжэлтын һалбаринууд болон мүнгэ һомололгын түсэлнүүдтэй танилсаба.
- Хари гүрэнэй түлөөлэгшэдтэй эмхидхэгдэһэн уулзалгада Засагай газарай, уласай хүгжэлтын жасын түлөөлэгшэд, олзын хэрэг эрхилэгшэд уригдаба. Аяншалга, гэрнүүдые барилга, транспортын хангалгын байгууламжа болон үйлэдбэриин һалбаринуудта анхаралаа хандуулнабди. Аша үрэтэйгөөр ажалаа ябуулхын тула олзын хэрэг эрхилэлгэ олзын хэрэг эрхилэлгэдэ (В2В) гэһэн маягаар энэ уулзалга үнгэргэгдэхэ. Тиихэдэ Буряад Уласта олзын хэрэг эрхилхэ арга боломжонуудые Хитадай түлөөлэгшэдтэ харуулха шухала - гэжэ Буряад Уласай Засагай газарай Түрүүлэгшын эдэй засагай хүгжэлтын талаар орлогшо Игорь Зураев хэлэбэ.
Хитадай “Центр Глобальной бизнес-культурной коммуникации” эмхиин генеральна секретариин орлогшо Синь Гунли гэгшын хэлэһэнэй ёһоор, тэдэнэр Ородой Холбоото Улас болон Хитадай хоорондо эдэй засагай һалбарида харилсаа хүгжөөхэ гэжэ оролдодог юм.
- Манай делегаци 16 олзын хэрэг эрхилэгшэдһээ бүридэнэ. Тэдэнэр олон түсэлнүүдээр һонирхоно. Нэрлэбэл, “Байгал” аэропорт, зочид буудалнуудай барилганууд. Тиихэдэ хотын хангалгын байгууламжын талаар түсэлнүүдые хараха түсэбтэйбди, - гэжэ Синь Гунли тэмдэглэбэ.
Евразиин гүрэнүүдэй хоорондохи харилсаа бэхижүүлхэ, худалдаа наймаа, мүнгэ һомололго хүгжөөхэ талаар байгуулагдаһан “Один пояс, один путь” гэһэн түсэлөөр Хитадай олзын хэрэг эрхилэгшэд Буряад Улас ерэһэн байна.
Уласай дэбисхэртэ мүнгэ һомололгын түсэлнүүдые, эдэбхи үүсхэлнүүдые урагшатай бэелүүлхэ, дэлгэрүүлхэ талаар Буряад Уласай Мүнгэ һомололгын деклараци абтаһан байна. Тэрэнэй ёһоор уласай Засагай газартай хамта ажал ябуулагдаха юм. Тиихэдэ мүнгэ һомололгын түсэлнүүдэй эдэбхитэй, аша үрэтэйгөөр бэелүүлэгдэхэ талаар дурадхалнуудые оруулха, захиргаанай һаад түбэг бага болгохо гэжэ Буряад Уласай Толгойлогшын дэргэдэ Зүблэл байгуулагдаба. Тэрэнэй бүридэлдэ уласай Засагай газарай түлөөлэгшэдһөө гадна федеральна засаг зургаануудай түлөөлэгшэд, олзын хэрэг эрхилэлгын һалбаринуудай олониитын эмхи зургаануудай хүтэлбэрилэгшэд ороһон байна.
Буряад Уласай Засагай газарай мэдээсэлэй албанһаа гэрэл зураг абтаба.
