878
Байгша оной августын 11-һээ 18 болотор Улаан-Баатарта Хүүгэдэй уласхоорондын 7-дохи нааданууд эмхидхэгдэхэ.
Энэ хэмжээ ябуулгада Ородой Холбоото Уласай, Монгол, Хитад гүрэнүүдэй эдир тамиршад хабаадаха. Буряад Уласай хүбүүд, басагад дзюдо, сүлөөтэ барилдаан, һур харбаан, бокс, шэрэйн теннис, бага футболоор мүрысэхэ юм. Тэдэнэртэй хамта эмшэн болон һоригшод хүршэ гүрэн ошолсохо. Буряад Уласай Спортын болон залуушуулай бодолгын талаар яаманай тамирай болон халааниие бэлдэдэг таһагай дарга Баир Дашибальжиров делегаци түлөөлхэ юм.
Нааданай үедэ “Спорт үхибүүдтэ” гэһэн Уласхоорондын хуралдаан эмхидхэгдэхэ гэжэ түсэблэгдэнхэй. Үхибүүд болон залуушуулай бэеэ һорихо, элүүржэхэ, тэдэнэй дунда тамирай һалбари хүгжөөхэ талаар Ород, Монгол, Хитад гүрэнүүдэй түлөөлэгшэд дүй дүршэлөөрөө андалдаха.
2006 ондо үнгэргэгдэһэн Бүгэдэ Буряадай “Алтаргана” нааданай үнгэргэдэжэ байхада, хүүгэдэй наадануудые эмхидхэхэ тухай шиидхэбэри абтаһан юм гэжэ һануулнабди. Хүүгэдэй болон залуушуулай дунда үнгэргэгдэдэг уласхоорондын тамирай мүрысөөн олоной һонирхол татадаг болонхой.
2011, 2015 онуудта Хүүгэдэй уласхоорондын нааданууд Улаан-Үдэдэ эмхидхэгдэһэн байна.
