889
Монгол гүрэнэй ниислэл хото Улаан-Баатарта «Буряад Уласай мүнгэ һомололгын арга боломжо» гэһэн бизнес-хуралдаан ажалаа эхилбэ.
Буряад Уласай Толгойлогшо Алексей Цыденов болон уласай 30 үйлэдбэринүүд энэ түүхэтэ хэмжээ ябуулгада уласаа түлөөлнэ. Хүршэ гүрэнүүдэй олзын хэрэг эрхилэгшэд түрүүшынхиеэ уулзажа, суг хамта аша үрэтэйгөөр ажалаа ябуулха арга боломжонууд тухай хэлсэхэ юм.
Монгол гүрэнэй 300-гаад олзын хэрэг эрхилэгшэд, тиихэдэ Хитадай болон Монголдо олзын хэрэг эрхилдэг бусад гүрэнүүдэй түлөөлэгшэд хуралдаанда хабаадана гэжэ тэмдэглэхэ хэрэгтэй. Буряад Уласай тус хэмжээ ябуулга үнгэргэхэ тухай дурадхал хүршэ гүрэндэ дэмжэжэ, энэ хуралдаан Улаан-Баатарай «Blue Sky» гэһэн зошод буудалда үнгэргэгдэнэ. Тиихэдэ олондо мэдээсэл тараадаг хэрэгсэлнүүдэй һонирхол Буряадай олзын хэрэг эрхилэгшэд татаһаниинь һайшаалтай.
Буряад Уласай Толгойлогшо Алексей Цыденов амаршалгын үгэ хэлэхэдээ, хоёр гүрэндэ аша үрэтэйгөөр ажалаа ябуулха найдалтай ерэһэн тухайгаа мэдүүлбэ.
«Буряад Уласта һүүлэй үедэ олзын хэрэг эрхилэлгэ хүгжэнэ. Тиимэһээ бидэ ехэ түсэбүүд болон зорилгонуудтайбди. Олон түсэлнүүд бэелүүлэгдэжэ эхилэнхэй. Мүнөөдэрэй уулзалгын ашаар саашадаа суг хамта олзо, аша үрэ ехэтэйгээр ажалаа ябуулхабди гэжэ найданаб», - гэжэ Алексей Цыденов хэлэбэ.
Монгол гүрэнэй Худалдаа-наймаанай танхимай гүйсэдхэхы секретарь, бизнес-хуралдаа эмхидхэгшэдэй нэгэн Э. Оюунтэгшын тэмдэглэһээр, хүршэ гүрэнүүдэй суг хамта ажал ябуулга 2017 ондо һайн үрэ дүнтэй байгаа.
«Үнгэрһэн жэлдэ Монгол, Ород гүрэнүүдэй хоорондохи харилсаан бүри үргэн хэмжээндэ гараһан байна. Парламент хоорондын болон худалдаа-наймаанай танхимуудай уулзалганууд олон үнгэргэгдөө», - гэжэ Оюунтэгш тэмдэглэбэ.
Монголой Ехэ Хуралай гэшүүн, Монгол болон Ород гүрэнэй парламент хоорондын бүлэгэй түрүүлэгшын орлогшо Б. Энх-Амгаланай һанамжаар, хоёр гүрэнүүдэй хоорондохи харилсаан 2014 ондо Улаан-Үдэдэ Улаан-Баатарай үдэрнүүдэй һүүлээр бүри үргэдхэгдөө. Тиихэдэ Ородой Холбоото Уласай эдэй засагай хуралдаануудта Монголой түлөөлэгшэд эдэбхитэй хабаададаг юм. Тэдэнэр Красноярск, Санкт-Петербург болон Владивосток хотонуудта үнгэргэгдэһэн эдэй засагай хэмжээ ябуулгануудта Буряадай түлөөлэгшэдтэй аша үрэтэй уулзалгануудта хабаадаһан байна.
Монголдо Ородой Холбоото Уласай бүрин эрхэтэ түлөөлэгшэ Искандер Азизовай хэлэһээр, 2014 ондо Ород болон Монгол гүрэнүүдэй хоорондо хилэ гараха зүбшөөрэл болюулагдажа, аяншалгын һалбарида, илангаяа Буряад Уласта, һайн нүлөөтэй болоһон юм. Энээнһээ уламжалан, мүнөөдэрэйшье уулзалга эмхидхэгдээ.
Буряад Уласай түлөөлэгшэд аяншалгын һалбари тухай сугларагшадта хөөрэһэн байна. Хуралдаанада хабаадагшад эдэй засагай «Байкальская гавань» гэһэн онсо газар, «Подлеморье» гэһэн аяншалгын комплекс, Улаан-Үдэ хотодо Орлиная хадада санаар һолжорхо комплекс, «Байкальский» болон «Хяагта» гэһэн автомобильна кластернуудтай танилсаба. Үшөө тиихэдэ «нээмэл огторгой» гэһэн зиндаатай болоһон аэропорт «Байгал» аяншалагшадые олоор угтан абаха аргатай болонхой. Буряад Уласай Засагай газар «Байкальская гавань» гэһэн эдэй засагай онсо газарта олзын хэрэг эрхилхэ талаар Монголой түлөөлэгшэдтэ туһа хүргэхөөр бэлэн гэжэ тэмдэглэхэ хэрэгтэй. Минеральна-түүхэй эдэй комплекс олоной һонирхол татаһан байна. Буряад Уласай хүгжэлтын жасын түлөөлэгшэ Константин Ботоевой хэлэһээр, иимэ уулзалгануудта саашадаа суг хамта ажал ябуулха нүхэд олдодог.
«Мүнөөдэрэй уулзалга олон хүнэй хабаадаалгатайгаар үнгэргэгдэнэ. Энээнһээ урид Монголой олзын хэрэг эрхилэгшэдтэй суг хамта хүдэлһэншье һаа, иимэ үргэн дэлисэтэй ууулзалганууд эмхидхэгдэдэггүй байгаа. Мүнөөдэр бидэнэр хадын үйлэдбэриин комбинадуудые хүгжөөхэ талаар түсэлнүүд тухай хөөрэбэбди», - гэжэ Константин Ботоев хэлэбэ.
Буряад Уласай үйлэдбэриин болон худалдаа наймаанай сайд Алексей Мишенинэй тэмдэглэһээр, Монголһоо ороһон эд бараан 13,8 хубяар, Буряадһаа Монголдо худалдаһан эдэ бараан 23,7 хубяар дээшэлээ. Иимэ хэмжээ ябуулгын ашаар худаладаа наймаанай эрьесэ дээшэлүүлэгдэхэ.
Энэ хуралдаан хадаа удаан сагай болзорто суг ябуулха ажалай түрүүшын шата гэжэ Буряад Уласай хүтэлбэрилэгшэ хэлэбэ. Энэ хэмжээ ябуулгын хабаадагшадые харуулһан түсэлнүүдтэй хаража танилсахыень Алексей Цыденов уриба.
Борис Балдановай гэрэл зураг
