893
Ородой Холбоото Уласай Барилдаанай федерациин хүтэлбэрилэгшэ Михаил Мамиашвили үсэгэлдэр албанай хэрэгээр Буряад Улас ерэһэн байна.
Михаил Мамиашвили Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов, тамирай болон залуушуулай бодолгын талаар сайд Вячеслав Дамдинцурунов гэгшэдтэй хамта улас дотор барилдаа хүжөөхэ талаар зүблөө үнгэргэбэ. Энэ хэмжээ ябуулгада БуряадаУласай түрүү барилдаашад болон тэдэнэй һоригшод хабаадалсаба.
Зүблөөнэй эхиндэ Вячеслав Цыбикжапов Ородой Холбоото Уласай Барилдаанай федерациин хүтэлбэрилэгшэдэ ерэһэндэнь баяр хүргэжэ, Буряад Уласта тамирай олониитэдэ удха шанартай хэмжээ ябуулга боложо байна гэжэ хэлэбэ.
- Спортын нэгэ зүйл болохо барилдаанай хүгжэлтэдэ хубитаяа оруулжа, Буряад Уласта ябуулагдаһан ажал тэмдэглэгдэнэ. Буряад Уласай Толгойлогшо Алексей Самбуевич Цыденовэй хэлэһэнэй ёһоор, сүлөөтэ барилдаан улас дотор хүгжэхэ, чемпионуудые хүмүүжүүлһээр байхабди, - Буряад Уласай Засагай газарай Түрүүлэгшын ниигэмэй хүгжэлтын талаар орлогшо хэлэбэ.
Буряад Уласые «барилдаанай» можо нютаг гээд хүгжөөхэ арга боломжонууд бии гэжэ Михаил Мамиашвили тэмдэглэбэ.
- Эгээл шухалань гэхэдэ, барилдаан хадаа уласай соёлой хуби болоно. Буряадта барилдаанда дуратай, үндэр амжалтануудые туйлажа шадаха. Тиихэдэ уласай хэмжээндэ барилдаашадай дунда ехэ тэмсээнүүд болодог, - гэжэ тэрэ хэлэбэ.
Буряад уласта эхэнэрнүүдэй барилдаанай түб байгуулха гэһэн асуудал зүблөөнэй шухала асуудалнуудай нэгэн болобо. Ородой Холбото Улас дотор энэ түсэл бэелүүлгээр Буряад улас арбан можо нютагуудай тоодо ороһон байна.
- Ородой Холбоото Улас дотор эхэнэрнүүдэй барилдаан ехэ дэлгэрэнхэй бэшэ. Тиимэһээ энэ талаар байдал хубилгаха хэрэгтэй. Энэ һалбарида ажал ябуулха, түсэл бэелүүлхэ талаар Буряад Улас ехэ тааруу байна, - гэжэ Ородой Холбоото Уласай Барилдаанай федерациин вице-президент Омар Мартузалиев зүблөөндэ хэлэбэ.
Эхэнэрнүүдэй бариладаанай уласай түбэй барилгааар түсэл бэлдэгдэжэ байна. Эндэ ганса бэеэ һорихо танхимуудһаа гадуур, эдеэ хоол бариха газар, зошод буудалай болон массаж хэхэ танхимууд хараалагданхай.
Буряад Уласай Засагай газарай мэдээсэлэй албанһаа гэрэл зураг абтаба
