863
Буряад Уласай Толгойлогшын шанда хүртэхэ сүлөөтэ барилдаагаар мүрысөөн байгша оной мартын 9-һөө 12 болотор Улаан-Үдэдэ 23-дахияа эмхидхэгдэхэ.
Дэлхэйн эрхим тамиршад сүлөөтэ барилдаагаар уласхоорондын мүрысөөндэ хабаадахаяа ерэхэ юм. Тиихэдэ Буряад Уласаа 32 тамиршад түлөөлхэ. Мүрысөө эмхидхэгшэдэй хэлэһээр, энэ турнирта Ородой Холбоото Уласай можо нютагуудай болон хари гүрэнүүдэй 160-аад тамиршад мүрысөөндэ хаба шадалаа туршаха юм. Ородой Холбоото Уласай барилдаанай федерациин шиидхэбэреэр, байгша ондо мүрысөөнэй дүнгүүдээр Дэлхэйн кубогта болон Европын чемпионадта хабаадаха суглуулагдамал команда бүридхэгдэхэ.
“Ородой Холбоото Уласай суглуулагдамал командын тамиршад мүрысөөндэ хабаадаха. Эдэ хадаа Олимпиин наадануудай, дэлхэйн болон Европын чемпионадта шанда хүртэгшэд болоно”, - гэжэ Тамирай бэлэдхэлэй түбэй захиралай орлогшо Ольга Эрдэнеева хэлэбэ.
Бразили, Болгари, Венгри, Литва, Хитад, Монголи, Белорусси, Казахстан, Урда Солонгос болон Эстониин тамиршад Буряадай хибэс дээрэ хаба шадалаа туршалсаха юм. Мүрысөөнэй гуримай ёһоор, тамиршад 10 шэгнүүртэ барилдаха, тиихэдэ уласхоорондын болон олимпиин зиндаатай шүүгшэд мүрысөө сэгнэхэ.
Шангай жаса 3,2 сая түхэриг болоно. Түрүү һуури эзэлэгшэд – 100-100 мянган түхэриг, хоёрдохи һуури эзэлэгшэд – 70-70 мянган түхэриг болон гурбадахи һуури эзэлэгшэд 50-50 түхэригэй шанда хүртэхэ. Тиихэдэ тамиршадай һоригшод баһал иимэ шанд хүртэхэ юм. Буряад Уласай сүлөөтэ баилдаагаар ахамад һоригшо Цыбик Максаровай хэлэһээр, мүрысөөндэ илагшад уласхоорондын турнирнуудта хабаадахаар Ородой Холбоото Уласай суглуулагдамал командын бүридэлдэ орожо болохо.
Анна Огороднигой гэрэл зураг
