Европын түб болохо Словенидэ Буряадай тамиршад тхэквандогоор ялас гэмэ амжалтануудые туйлаба. Европын чемпионадһаа тэдэ зургаан медаль асарба.
Марибор хотодо эмхидхэгдэһэн энэ мүрысөөндэ 28 гүрэнэй 642 тамиршан хабаадаа гээд хэлэлтэй. Ородой суглуулагдамал командын бүридэлдэ ороһон 67 тамиршанай дунда Буряадай 7 түлөөлэгшэ оролсобо.
2017 оной эдиршүүлэй дунда дэлхэйн чемпион Дмитрий Петухов дахинаа шалгаржа, Европын чемпионой нэрэ зэргэдэ хүртэһэн байна. Ирланди, Испани, Итали болон Финлянди гүрэнүүдэй тамиршадые Дмитрий илажа гараа.
Эдиршүүлэй дунда үшөө нэгэ дэлхэйн чемпион Екатерина Абидуева энэ мүрысөөндэ мүнгэн медаль абаба. Румыни, Шотланди болон Ородой тамиршадые шүүгээд, тэрэ финалда Польшо гүрэнэй түлөөлэгшэдэ булигдаа. Гэбэшье Екатерина Европын чемпион боложо шадаа: түрүүлжэ гараһан Ородой суглуулагдамал командын бүридэлдэ тэрэ оролсоо юм. Командна тоосоондо үшөө нэгэ Буряадай тамиршан Екатерина Борошноева хабаадажа, баһа Европын чемпион боложо тодороо.
Тусхай техникэ харуулха талаар Ородой басагад, тэрэ тоодо манай Екатерина Борошноева болон Вера Белых гэгшэд шангай гурбадахи һуури эзэлээ.
Буряадай тамиршад эдэ үдэрнүүдтэ гэртээ бусаха.