Буряадай түрүү шатаршан ябаһан Бадмацыбык Цыденовэй мүнхэ дурасхаалда зорюулһан ном нара хараба.
Дээдын гарай һоригшо Евгений Байнов, мүн Ивалгын “Шатар” клубые эмхидхэһэн эдэбхитэн Василий Аюров гэгшэд энэ ном хэблэн гаргаа. Тиигэжэ майн 4-дэ үдэрэй 12 сагта Үндэһэтэнэй номой санда үнгэрхэ энэ номтой танилсуулгын хэмжээндээ үргэн олониитые урина.
“Бадмацыбык багшын шатарай хэшээлнүүд” гэһэн ном дотор наһанайнь намтар, суг хүдэлһэн зоной дурсалганууд, мүн үнэтэ хэшээлнүүдынь оронхой. Эрхим түрүү багша, шатаршан Бадмацыбык Базаржапович буряадуудай дундаһаа эгээл түрүүн Буряадай чемпион гэжэ үндэр нэрэ зэргэдэ хүртэһэн, таба удаа Улаан-Үдын чемпион болоһон, Сибириин болон Алас Дурныншье чемпион гэгдэһэн. Гадна “Буряадта шатар” гэжэ ном хэблүүлэгшэдэй нэгэн мүн.
Бадмацыбык багша түрэһэн нютагтаа, Ивалгада, 1917 ондо һургуули байгуулаад, захиралаарнь олон жэлдэ хүдэлөө. Түрэхэһөө түни бэрхэ, һүбэлгэн ухаатай Бадмацыбык Базаржапович хаанашье хүдэлхэдөө, шатараа мартадаггүй байгаа. Буряадай радиодо оршуулагшаар нэгэ үедэ хүдэлһэн. Гунга Чимитовэй наһанайнь нүхэр Цэпэл Доржиевна иигэжэ дурсан hанана: “... Бадмацыбык Базаржаповичай радиодо хүдэлөөгүй һаань, ямар байха байгаа юм һэм, зүгөөр коллективэй хүн бүхэниие гэхээр шатарай нааданда һургаа һэн. Радиогоймнай эгээн ехэ дарга Григорий Филиппович Бахановһаа эхилээд, машинисткэ хүрэтэрөө булта наадахабди. Шатар болоходонь, хамагаа мартаад, үдэшэ оройшье байг, амаралтын үдэршье байг, хюлгэ дээрэхи сагаан хара сэрэгүүд урда урдаһаа тулалдажал мэдэдэг бэлэй...”