​Буряадай барилдаашадай амжалтанууд

Үнгэрһэн долоон хоногой хугасаада Буряадай барилдаашад хэдэн амжалтануудые туйлаһан байна. Оюутадай дунда Ородой чемпионадта хоёр бүхэшүүл түрүү һууринуудые эзэлээ. Мүн залуушуул һайн үрэ дүнтэйгөөр Монголоор ябажа ерээ. Гэхэтэй хамта, “Монголия оупен” гэһэн уласхоорондын мүрысөөндэ хабаадахынгаа урда тээ Ородой эхэнэрнүүдэй суглуулагдамал команда бэлэдхэлээ Улаан-Үдэдэ хэжэ эхилээ.

Бразили ошохо харгы нээгдээ

Оюутадай дунда Ородой чемпионат Раменское хотодо болоһон байна. Тус мүрысөөндэ дэлхэйн чемпионадта хабаадаха эрхэдэ түрүүлһэн тамиршад хүртөө. Тиихэ зуураа нэгэдэхи-хоёрдохи һууринуудые эзэлэгшэд Ородой чемпионадта хабаадаха болоо.

Алексей Боровицкий 65 килограмм хүрэтэр шэгнүүртэ чемпионой нэрэ зэргэдэ хүртөө. Мүн 70 килограмм хүрэтэр шэгнүүртэ Евгений Жербаев түрүүлээ. Буряадаймнай эдэ хоёр барилдаашад финалда Дагестанай тамиршадые илажа гараа. Тиигэжэ сентябриин эхиндэ Бразилида болохо оюутадай дунда дэлхэйн чемпионадта хабаадаха эрхэтэй болоо.

74 килограмм хүрэтэр шэгнүүртэ Арсалан Будажапов шангай хоёрдохи һуурида гараа. Тэрэ финалда Красноярск хотын оюутан Никита Сучковто шүүгдээ.

Эхэнэрнүүдэй дунда мүрысөөндэ Валерия Суворова түрүүлжэ гараа гээд хэлэхэ шухала.

Түүхэтэ үйлэ хэрэгтэ зорюулагдаа

Монголой барилдаашад Олимпиин наадануудта анха түрүүшынгээ медаль 50 жэлэй саада тээ абаһан байна. Чимитбазарын Дамдиншарав хүрэл медальда хүртэжэ, тамирай түүхэдэ ороһон юм. Тус ойн баярта зорюулагдаһан мүрысөөн һаяхана Улаан-Баатарта боложо түгэсэбэ. Буряадаймнай залуу барилдаашад һайн дүнгүүдые харуулаа.

30 суглуулагдамал командын 270 гаран тамиршад Монголой хибэс дээрэ гараа. Тэрэ тоодо Буряадай юһэн тамиршад оролсоо.

71 килограмм хүрэтэр шэгнүүртэ Буян Цыренов түрүүлжэ гараа. Һоригшо Баяр Цыреновой мэдээсэһээр, Буян гоё гэгшын барилдаа харуулжа, бүхы дүрбэн уулзалгануудтаа илалта туйлаа. Ехэшүүлэй дунда Монголой чемпионадта шангай һуури эзэлһэн тамиршаниие Буян финалда 12:2 гэһэн тоотойгоор шүүһэн байна.

Денис Данжалов болон Жаргал Доржиев гэгшэд хоёрдохи һуури эзэлһэн байнад. Тиихэдэ Эрдэм Шарастепанов гурбадахи һуурида гараа.

Томо мүрысөөндэ бэлэдхэл

Мүнөө жэл “Mongolia Open” гэһэн уласхоорондын мүрысөөн июниин 9-10-ай үдэрнүүдтэ үнгэргэгдэхэнь. Тус мүрысөөн юрэл уласхоорондын байтараа, 2018 ондо рейтинговэ болгогдожо, дэлхэй дээрэ эгээл томо уласхоорондын дүрбэн мүрысөөнэй тоодо оруулагдаа. Тиимэһээ эндэ илалта туйлаһан барилдаашадта удха шанарынь ехэ болохонь. Мүн дэлхэйн эгээл шанга тамиршад Улаан-Баатар ерэхэеэ шамдаха.

“Mongolia Open” мүрысөөндэ Ородой суглуулагдамал команда бүхы түрүү тамиршадаа эльгээхэ түсэбтэй. Тэрээнһээ боложо, эхэнэрнүүдэй команда Буряад Уласта бэлэдхэл хэжэ эхилээ. 16 хүн, тэрэ тоодо Буряадаймнай Стальвира Оршуш болон Ирина Ологонова гэгшэд шанга һорилго гарана.