​Нина Менкенова дахинаа шалгараа

UWW сайтhаа гэрэл зураг абтаа

Үнгэрһэн долоон хоног­то Стамбул хотодо 23 наһа хүрөөдүй тамиршадай дун­да Европын чемпионат боло­жо түгэсэбэ. Буряад Уласые түлөөлжэ, Ородой суглуулаг­дамал командын бүридэлдэ ороһон Нина Менкенова чем­пионой нэрэ зэргэдэ хүртөө.

Нина Менкенова тус мүрысөөндэ 55 килограмм хүрэтэр шэгнүүртэ хибэс дээрэ гараа. Буряадай тамиршан гур­бан уулзалгаяа шүүжэ шадаа. Тиигэжэ Нина Беларусь Уласай Светлана Ламашкевичые 10:2 гэһэн тоотойгоор илаа. Хахад финалай уулзалгада тэрэ Вен­гриин Рамона Галамбос гэгшые 5:4 гэһэн тоотойгоор шүүгээ. Алтан медаль абахын түлөө уул­залгада Германиин Елена Брюг­гер Нина Менкеноватай тэмсэхэ аргагүй байшоо, Буряадаймнай тамиршан 5:0 гэһэн тоотойгоор илалта туйлаа.

Энэ мүрысөөндэ манай гүрэнэй эхэнэрнүүд 6 медаль абажа шадаа. Ородой суглуулаг­дамал командын гэшүүд Алек­сандра Андреева болон Мария Кузнецова гэгшэд Европын чем­пионой нэрэ зэргэдэ хүртөө.

Нина Менкенова хадаа халь­маг уг гарбалтай. Һүүлэй хэдэн жэлэй туршада тэрэ Буряадта ажаһуужа, Юлия Бумбошкина­гай ударидалга доро һорилго хэнэ.