Эрэмдэг бэетэй харбаашад ээлжээтэ амжалтануудаа туйлаба. Тэдэ Европын Кубогта хүртэхын түлөө хоёрдохи шатын мүрысөөндэ шалгараа.
Тус мүрысөөн Чехи гүрэнэй Нове-Место хотодо үнгэргэгдөө. 31 гүрэнэй 284 тамиршадай дунда Буряадаймнай түлөөлэгшэд һайн дүнгүүдые харуулаа.
Мэдээжэ тамиршан ябаһан Светлана Гомбожаповагай шаби Сергей Хутаков энэ мүрысөөнэй хубиин тоосоондо түрүүлжэ гараа. Мүн тиихэдэ командна микст тоосоондо Александр Дорофеев Московско можын Елена Крутоватай чемпионой нэрэ зэргэдэ хүртөө.
Үшөө тиихэдэ Сергей Хутаков микст тоосоондо Краснодарай Маргарита Сидоренкотой хамта хүрэл медаль абажа шадаа. Буряадай Татьяна Андриевская, Саха-Яхад Уласай Степанида Артахинова болон Елена Крутова гэгшэд командна мүрысөөндэ гурбадахи һуури эзэлээ.
Ородой суглуулагдамал командын ахамад һоригшо Виктор Сапуновай хэлэһээр, Европын Кубогта хүртэхын түлөө хоёрдохи шата түрүүшын мүрысөөнһөө олон тамиршадые суглуулаа.
- Эндэ ганса Европын команданууд ерээ бэшэ, мүн Азиин, Америкын тамиршад хабаадаа. Дэлхэйн Кубогта хүртэхын түлөө адли шанга тулалдаан болоо гээшэ. Тэдээн соо манай тамиршад һайн дүнгүүдые харуулһандань баярламаар, - гэжэ Виктор Сапунов хөөрэнэ.
Европын Кубогта хүртэхын түлөө мүрысөөнэй хоёр шатын дүнгөөр түрүү һуури эзэлэгшэд элирүүлэгдээ. Эндэ Ородой аяар 10 түлөөлэгшэд ороһониинь һайшаалтай. Саха-Яхадай Степанида Артахинова болон Башкортостанай Антон Зяпаев гэгшэд Европын Кубогта хүртөө. Энэ тоосоондо манай Сергей Хутаков хоёрдохи һуурида гараа. Шангай һуури эзэлэгшэдэй тоодо Татьяна Андриевская болон Александр Дорофеев гэгшэд ороо.
Мүнөө үедэ Ородой тамиршад Европын чемпионадта шанга бэлэдхэл эхилээ. Энэ мүрысөөн августын тэгэндэ Польшо гүрэнэй Пильсен гэжэ хотодо болохоор хараалагдана.