Буряад Уласай уласхоорондын түрүүшын гроссмейстер Монголой ниислэл хотодо болоһон томо мүрысөөндэ шангай гурбадахи һуури эзэлжэ шадаа.
«Chinggis Invitational» гэһэн шатарай мүрысөөн дүрбэдэхиеэ эмхидхэгдэнэ. Урдахи гурбан тулалдаанууд Америкын Сан-Франциско хотодо үнгэргэгдэһэн байна. Тиимэһээ энэ мүрысөөн ехэ удха шанартай. Юуб гэхэдэ, эмхидхэгшэд өөрын дураар шатаршадые урина. Тэдэ дэлхэйн рейтинг соо 2500-һаа дээшэ очкотой байха ёһотой. Мүнөө жэл Ородой, США- гай, Азербайджанай, Индиин шатаршад уригдаһан байна.
10 наадагшад бэе бэетэеэ наадажа үрдиһэн байна. Америкын Рэй Робсон түрүү һуурида гараа. Мүн Азербайджанай Ният Абасов мүнгэн медальда хүртөө. Буряадаймнай Антон Шомоев гурбадахи һуури эзэлээ.
Тус мүрысөөндэ Ород гүрэниие Новосибирск хотын Дмитрий Бочаров түлөөлөө. Тиихэдэ Монголой гурбан шатаршад муугаар наадаа.
Борис Балдановай гэрэл зураг