Үнгэрһэн долоон хоногто Якутск хотодо болоһон уласхоорондын мүрысөөндэ Буряадай тамиршад дүрбэн хүрэл медаль абажа шадаа. Евгений Жербаев түрүү һуури эзэлжэ, бүхы харагшадаа болон спортдо дуратайшуулые баярлуулба.
Саха (Яхад) Уласай суута һоригшо Дмитрий Коркиной дурасхаалда зорюулагдаһан энэ мүрысөөндэ 20 гаран гүрэнүүдэй 194 барилдаашан хибэс дээрэ гараа. Дмитрий Коркин амиды мэндэ ябаа һаа, 90 наһа хүрэхэ байгаа. Энэ ойн баярта зорюулагдажа, олон тоото хэмжээ ябуулганууд Якутск хотодо болон аймагуудта үнгэргэгдөө. Эгээл томонь хадаа барилдаанай мүрысөөн боложо үгөө.
Буряадай тамиршад сооһоо эгээл ялас гэмэ амжалта Евгений Жербаев туйлаа. 70 килограмм хүрэтэр шэгнүүртэ тэрэ хэдэн һайхан илалтануудые асарба. Хахад финалда Олимпиин наадануудай абарга чемпион Сослан Рамоновтой уулзажа, 8:0 гэһэн тоотойгоор шүүжэ гараа. Оройдоол һара урид эдэ хоёр Ород гүрэнэй чемпионадта хабаадажа, Рамоновынь илалта туйлаһан байна. Тиигэжэ Евгений Жербаев финалда Монголой барилдааша Бат-Эрдэнэ Бямбадоржтой уулзаа. Тэмсээнэй түрүүшын шатада ана-мана барилдаан болоо. Харин хоёрдохи шатадань Евгений бүхы шадалаа харуулжа, монгол тамиршанда багаханшье найдал үлээбэгүй. Иигэжэ Евгений Жербаев Дмитрий Коркиной мүрысөө гурбадахияа шүүбэ.
- Манай мүрысөөндэ эрхим барилдаашан гэһэн нэрэ зэргэ олгогдобол, Евгений Жербаев энэ шанда хүртэхэ байгаа, - гэжэ Якутскын сурбалжалагшад бэшэнэ.
Тус мүрысөөндэ Буряадай тамиршад үшөө дүрбэн хүрэл медаль абаа. 57 килограмм хүрэтэр шэгнүүртэ Димчик Ринчинов болон Тамир Гармаев гэгшэд шалгараа. Ринчинов хадаа Белоруссиин түлөө барилдаа гэжэ һануулая. 65 килограмм хүрэтэр шэгнүүртэ Алексей Боровицкий гурбадахи һуури эзэлээ. Эгээл хүндэ шэгнүүртэй барилдаашадай дунда Балдан Цыжипов шангай гурбадахи һуурида гараа.
Якутскын хибэс дээрэ Монголой барилдаашад һайн дүнгүүдые харуулаа. Тэдэ табан мүнгэн, гурбан хүрэл медальнуудые нютагтаа абаашаа.
“Спортякутия.ru” гэһэн сайтһаа гэрэл зураг