Алексей Оловянников
Бага ба дунда хэмжээнэй олзын хэрэг эрхилэгшэдтэ гүрэнэй талаһаа тэдхэмжэ хэр зэргэ үзүүлэгдэдэг бэ гэһэн сэдэбээр сэтгүүлшэдтэй хөөрэлдөө сайдай орлогшо Алексей Оловянников үүсхэбэ.
Олзын хэрэг эрхилэгшэдые дэмжэхын тулада 14 хэмжээн гүрэнэй программада хараалагданхай. Тэрэ тоодо Буряад Уласай Үйлэдбэриин ба худалдаа наймаанай яаманай талаһаа туһаламжа ороно. Ородой Холбоото Уласай Юрэнхылэгшын 2018 оной майн 7-до баталһан “2024 он хүрэтэр болзорто Ородой Холбоото Уласай үндэһэн зорилгонууд болон хүгжэлтын талаар холын хараатай бодолго” зарлигай ёһоор тэдхэмжэ үзүүлэгдэнэ.
Байгша ондо 27 олзын хэрэг эрхилэгшэ 46,05 сая түхэриг мүнгэ оньһон түхеэрэлгэдэ гаргашалһанаа бусаажа шадаа бшуу. Гаргашалагдаһан мүнгэнэй 50 хубиие гүрэн бусаана. Тиихэдээ нэгэ дэмжэлтэ абагшада 10 сая түхэриг мүнгэн болоно.
“Ехэнхи олзын хэрэг эрхилэгшэдтэ үйлэдбэрилгэеэ шэнэлхэ гээшэнь орёо. Тиимэ һэн тула эрьесын мүнгэ зөөриһөө таһалха болоно. Эгээл энэ ушарта гүрэнэй дэмжэлтэ гээшэ тон хэрэгтэй ха юм”, - гэжэ Буряад Уласай үйлэдбэриин ба худалдаа наймаанай сайдай орлогшо Алексей Оловянников тэмдэглэнэ.
Жэшээлхэдэ, “Хлебушек” гэһэн хизаарламал харюусалгатай бүлгэм гүрэнэй тэдхэмжэдэ хүртэһэн байгаа. Энэ үйлэдбэриин ажал хүдэлмэритэй танилсаха арга боломжо тудаба.
Удаан хадагалмаар бэшэ хилээмэ ба амтатай зүйлнүүдые энэ байгуулга наймаанда табина. Анхан ганса хилээмэ ба хилээмэнэй зүйлнүүдые болгожо худалдадаг һаа, мүнөө жэл үйлэдбэриеэ үргэдхэжэ, кондитерска таһаг нээгээ. Тиигэхынь тулада Буряад Уласай Үйлэдбэриин ба худалдаа наймаанай яаманһаа 2,5 сая түхэриг тэдхэмжэ үгтөө бшуу. 2014 ондо байгуулагдаһан энэ үйлэдбэриие юрэнхы захирал Александра Ильинична Зандаева хүтэлбэрилнэ.
“Үйлэдбэри һарын туршада 139 тонно хилээмэ, 4,9 тонно кондитерска зүйлнүүдые буйлуулжа худалдана. Ажалай бүтэсэ дээшэлүүлхэ, шанар һайжаруулха ба ассортиментээ олон болгохын тулада үйлэдбэри шэнэ оньһон түхеэрэлгэтэй болоо. Илангаяа дабхарлан зуураһан талхаар хэгдэхэ кондитерска зүйлнүүдые буйлуулха аргатай болоо. Бэлэн болоһон зүйлнүүдээ хадагалаад байхын тулада хүргэшэ тодхогдоо. Мүнөө сагта зарим хүн диетэ гээшые сахидаг тулань шэнэ түхэлэй “Вита плюс”, “Ароматный”, “Кутузовская ржаная”, “Бородинский” болон бусад кондитерска зүйлнүүдые буйлуулжа эхилээбди. Наймаанда табигдажа худалдагдаха үйлэдбэриингээ зүйлнүүдэй түхэлэйнь һайн шанартай ба санитарна нормо гээшые баримталхын түлөө орёохо тусхай хэрэгсэл худалдажа абаабди. Һалхитуулхын системэ ба һоролгын түхеэрэлтэ ажалшадай хүдэлмэриин байдалда, мүнөө үеын эрилтэнүүдтэ, экологическа нормонуудта таарамаар шэнэлэгдээ.
Любовь Цыбеновагай гэрэл зураг
Хилээмэн ба хилээмэнэй зүйлнүүд болбол бүдүүн хоол тоотой тула хамагай түрүүн наймаалагдадаг гэжэ булта мэдэнэбди. Бидэ Улаан-Үдын 500 шахуу дэлгүүрнүүдые, тиихэдэ тон дүтын Ивалга ба Онохой нютагуудые хилээмээр хангадагбди. Ябан ошон, ажалшадайнгаа ажал нэгэ бага хүнгэлжэ, үйлэдбэриеэ автоматизированнэ болгохо хүсэл байна. Хэнэйшье мэдэһээр, манай ажал хүндэ хүшэр, бага салинтай. Юрэнхыдөө энэ ушарта баһа гүрэнэй дэмжэлтэ хэрэгтэй боложо магадгүй. Гэбэшье уласаймнай Толгойлогшо Алексей Цыденов зайн галда хүнгэлэлтэ оруулжа, үйлэдбэриин хүгжэл- тэдэ шэнэ түлхисэ үгэбэ. Алмаһан мүнгэеэ ажалшадайнгаа салинда нэмээбди”, - гэжэ Александра Ильинична дуулгана.
Олондо мэдээсэл тараадаг хэрэгсэлнүүдэй сурбалжалагшад энэ үйлэдбэриин ажалтай дүтөөр танилсаха зуураа хүндэ ажал хэдэг ажалшадые хаража, цех соохи халуун агаарыень бэе дээрээ үзэжэ, гэрэл зурагуудыень буулгажа абаа.