1036
Буряадай гэр байрын ажахын гурбан объектдэ Алас Дурнын федеральна тойрогой тэдхэмжын хэмжээндэ 160 саяһаа дээшэ мүнгэн һомологдохо. Уһа татаха, котельни бариха, худагай һэлбэн шэнэдхэхэ ажалнуудта мүнгэн шэглүүлэгдэхэ.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди.
Барилгын һалбарида үзүүлэгдэхэ тэдхэмжын ехэнхи хубинь, тодорхойлбол 93 сая түхэриг, Хойто Байгалай аймагай Ангоя һууринда котельни барилгада дамжуулагдаха. Үшөө 1989 ондо баригдаһан котельни хуушаржа, гэрнүүдые дулаагаар хүсэд ханганагүй. Шэнэ баригдаха котельни талмайгаараа багашье һаа, ашаг үрэтэй байха гэжэ түсэблэгдэнэ.
Тиихэдэ Ярууна аймагай Нарһата һууринай ажаһуугшадые уһатай болгохо хэрэгтэ 54 сая гаргашалагдаха. Барилгын ажал 2020 ондо эхилхэ юм. Тэрэшэлэн Нарһата һууринда худагай һэльбэн шэнэдхэлгын ажал 2019 ондо эхилжэ, тэрэнэй заһабарилгада 14 саяһаа дээшэ түхэриг һомологдохо юм.
