971
Алас Дурнын федеральна тойрогой тэдхэмжын хэмжээндэ Буряад Уласай Хэжэнгэ аймагта шэнэ стадион барилгада 44 сая түхэриг һомологдохо. 100х65 метр талмайтай хүл бүмбэгэ наадаха поли, 400 метр утатай гүйхэ харгы, 100 харагшадай трибуна тамирай шэнэ эмхидэ баригдаха.
Хэжэнгэдэ баригдаха стадиондо аймагай болон уласай хэмжээнэй мүрысөөнүүд эмхидхэгдэхэ. Тиихэдэ аймаг дотор хүнгэн атлетикэ болон хүл бүмбэгэ хүгжөөлгэдэ стадионой барилга удха шанартай.
Буряад уласай Хэжэнгэ аймагта 15 мянганһаа дээшэ хүн ажаһуудаг. Тамирай шэнэ эмхи баригдажа, Хэжэнгэдэ бэеэ һоригшодой тоо олошоржо, саашадаа уласаа суурхуулха тамиршад урган гараха байха. Хүүгэдэй олимпиин наадануудай чемпион Алдар Бальжинимаев, Европын чемпионадай мүнгэн медальда хүртэһэн, Ородой Холбоото Уласай олон удаа чемпион Тамир Галанов болон бусад бэлигтэй хүбүүдээрээ Хэжэнгэ аймаг мэдээжэ.
Буряад Улас Алас Дурнын федеральна тойрогто оруулагдажа, уласай хүгжэлтэдэ Алас Дурнын федеральна тойрогой тэдхэмжэ үзүүлэгдэнэ. Алас Дурнын тойрогой тэдхэмжээр улас доторнай тамирай 13 объект баригдаха, заһабарилагдаха, һэльбэн шэнэлэгдэхэ. Улас дотор тамирай хангалгын байгууламжа һайжаруулха ажалда 511 сая түхэригһөө дээшэ мүнгэн шэглүүлэгдэхэ.
