1133
Буряад Уласай тамирай хангалгын байгууламжа үргэдхэгдэнэ. Алас Дурнын тойрогой тэдхэмжын хэмжээндэ улас дотор тамирай 13 объект баригдаха, һэльбэн шэнэлэгдэхэ, заһабарилагдаха юм. Буряад Уласай аймагуудай болон Улаан-Үдын хангалгын байгууламжа һайжаруулгада 511 сая түхэригһөө дээшэ мүнгэн һомологдохо юм.
Алас Дурнын федеральна тойрогой тэдхэмжын ашаар Захаамин аймагай Дүтэлүүр, Үлэгшэн, Хяагта аймагай Малая Кудара, Сэлэнгэ аймагай Ташар, Хойто Байгалай аймагай Уоян болон Муя аймагай Северомуйск һууринуудта хэмэл хушалтатай тамирай талмайнууд баригдаха. Тамирай 6 талмай барилгада 20,6 сая түхэриг шэглүүлэгдэхэ юм.
Эдэ нютагуудта тамирай мүрысөөнүүд соёлой байшануудта эмхидхэгдэнэ. Тиимэһээ тамирай талмайнуудай барилга ехэ удха шанартай.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди.
