1130
Буряад уласай барилгын болон гэр байрын ажахы хүгжөөлгын яаманда аймагууд болон, Улаан-Үдэ, Северобайкальск хотын захиргаануудтай оршон тойрониие болбосон түхэлтэй болгохо талаар ажалнуудта 306 сая түхэригэй хэлсээ баталаа. Тиихэдэ 300 саяһаа дээшэнь федеральна бюджетһээ һомологдохо юм. 2018 ондо орходоо, энэ мүнгэн 40 хубяар дээшэлһэн байна. «Гэр байра болон хотын оршон» гэһэн үндэһэтэнэй түсэлөөр мүнгэн аймагуудта шэглүүлэгдээ.
Хяагта аймагта 11 саяһаа дээшэ мүнгэн һомологдожо, сквер, паркнуудта заһабарилгын ажалнууд хэгдэхэ. Наушки һууринай «Здоровье» сквертэ гар бүмбэгэ наадаха талмай болон тренажёрнууд табигдаха. Усть- Кяхта нютагта нёдондо баригдаһан хоккейн талмайн дэргэдэ хубсаһа һэлгэхэ дулаан байшан баригдаха, эндэл тамирай хэрэгсэлнүүд хадагалагдаха.
Буряад уласай Кабанск аймагта һууринуудай оршон заһабарилха, шэнэлхэ ажалнуудта 25 саяһаа дээшэ мүнгэн һомологдохо юм. Селенгинск һууринда велопарк байгуулагдаха. Кабанск нютагта Эсэгэ ороной хамгаалгын Агууехэ дайнда унаһан сэрэгшэдэйнгээ дурасхаалда баригдаһан хүшөө һэльбэн шэнэлэгдэхэ.
13 гектар талмайтай парк болбосон түхэлтэй болгохо талаар ажалнуудта Северобайкальск хотодо 11 саяһаа дэээшэ түхэриг дамжуулагдаха.
«Гэр байра болон хотын оршон» гэһэн үндэһэтэнэй түсэлэй хэмжээндэ Буряад уласта «Гэр байра», «Болбосон түхэлтэй хотын оршон байгуулга», «Хүнүүдэй ажаһуухаар бэшэ болоһон гэрнүүдэй жаса доошолуулга» гэһэн программанууд бэелүүлэгдэнэ. Үндэһэтэнэй түсэл бэелүүлгэдэ бүхыдөө 4 миллиард түхэриг гаргашалагдаха.
«Болбосон түхэлтэй хотын оршон байгуулга» гэһэн түсэлдэ 1,5 миллиард түхэриг шэглүүлэгдэхэ юм. Энэ мүнгөөр олониитын 311 газар болон олон байратай гэрнүүд шадархи 1000 хото хоройдо заһабарилгын ажалнууд хэгдэхэ.
