804
Буряадай ажахынууд жэл бүри жэжэ эбэртэ малаа Шэтэ руу абаашажа харуулдаг һаабза. Харин байгша ондо XVI Сибириин - Алас Дурнын можо нютагууд хоорондын үүлтэртэ малай үзэсхэлэн Улаан-Үдэ руу нүүжэ, мүнөөдэр, июниин 5-да, үглөөнэй 10.00 сагһаа нээгдэбэ.
Промпаркын дэбисхэр дээрэ дэлгэгдэхэ үзэсхэлэн руу Алтайн, Алтайн хизаарай, Үбэр Байгалай хизаарай, Хакасиин, Тывагай болон Буряадай ажахынууд хони болон ямаадаа июниин 3-һаа асаржа эхилээ. Бүхыдөө 26 ажахы энэ үзэсхэлэндэ хабаадаха тухайгаа мэдүүлэнхэй.
Ородой Холбоото Уласай Хүдөө ажахын яаманай департамент толгойлдог Харон Амерханов заншалта ёһоороо энэ үзэсхэлэниие нээхэ болоо. Тиихэдэ Гүрэнэй Дүүмын хүдөө ажахын асуудалнуудаар хорооной гэшүүн Батор Адучиев, “Хони үсхэбэрилэгшэдэй үндэһэн зүблэлэй” захирал Михаил Егоров, Буряад Уласай Засагай газарай Түрүүлэгшын орлогшо Игорь Зураев нээлгын баяр ёһололдо баһал оролсохо юм. Хони болон ямаа үсхэбэрилгын хүндүүлхы асуудалнуудые хараалһан зүблөөн үзэсхэлэнэй үедэ үнгэрхэ.
Буряад Уласай фермернүүдэй дурадхаһан химиин холисогүй эдеэ эндэ худалдан абахаар байха.
Гадна уран һайханай коллективүүдэй тоглолтонууд, нооһо ашаглалгын хэшээлнүүд, һээр шаалган, һур харбаан болон бусад хэмжээнүүд эмхидхэгдэхэ юм. Гэбэшье хони хайшалгаар урилдаан олоной анхарал татаха ёһотой гээд, гол эмхидхэгшэд – Буряадай Хүдөө ажахын болон эдеэ хоолой яаман дуулгана.
Россиин дэбисхэр дээрэ оршодог Ураалһаа хойгуурхи можо нютагуудта тон удха шанар ехэтэй хэмжээнүүдэй нэгэн болохо тус үзэсхэлэн анха түрүүшынхиеэ Буряадта үнгэрхэнь гээшэ. Тиимэһээ хариһаа бууһан түрүү ажахынуудай дүршэл нютагтаа халан абаха арга боломжо үгтэбэ.
Тус үзэсхэлэн июниин 6 болотор үргэлжэлхэ. Улаан-Үдын Промпарк 10-дахи километртэ оршодог. Тиишээ 33, 46, 77-дохи автобусууд ябадаг.
«Буряад үнэн» мэдээсэлэй албан
Гэрэл зураг: vniiplem.ru
