![](/upload/iblock/b62/b62567231cd39ad02cf183cfd8cce513.jpg)
Кен Швенке сурбалжалагша гэрэйнгээ дорьбожо байһанһаа һэришэбэ. Үглөөнэй 6 саг 30 минута. Оронһоо собхоржо бодоод, ажалайнгаа шэрээдэхи компьютераа шагаахадань, иимэ мэдээсэл ониб-аниб гэжэ байба: “Америкын газар шэнжэлдэг албанай мэдээсэһээр, гарагай 2-ой үглөөгүүр Калифорни штадай Вествудһээ 5 миль газарта 4,7 балл хүсэтэй газар хүдэлөөн үзэгдөө”. Уншаһанаа “хэблэхэ” гэжэ тобшолуураар эльгээбэ, иигээд “Los Angeles Times” сонин түрүүшынхиеэ сайт дээрэ Quakebot гэжэ алгоритмын ашаар тус мэдээсэл тунхаглаа. Бэлдэһээр хэблэлдэ оротороо оройдоол 3 минута эзэлээ.
Энэмнай аяар 2014 оной ушар. 6 жэлэй туршада юрэдөө тад ондоо юртэмсэ тогтоо. Жэшээнь, «The New York Times» сониной мэргэжэлтэд уласайнгаа Конгрессэй гэшүүдые нюураарнь танидаг тусхай хэрэгсэл зохёогоо. Тэрэньшье зүйтэй, аяар 541 хүн тэндэнь ажаллана. Байд гээд һэлгэжэ байдаг гэшүүдые энэ-тэрэ ушарта дурдахадаа, һанажа абахань хэсүү бшуу. Харин хүршэ Хитадай Синьхуа мэдээсэлэй албанда хоёр жэлэй туршада “эхэнэр эрэ” кибер-хүтэлбэрилэгшэнэр ажаллажа захалһаар, бүмбэрсэг дэлхэйн олохон телевидениин ододые мэгдэхээнэ.
Хитадай Синьхуа мэдээсэлэй албанай видео
Буряадай сурбалжалгын юртэмсэ тус хубилалтанууд алад гараагүй. Мэдээжэ, олон уншагшадай һонирхол татадаг сайтнуудта тусхай һони шэлэн хэблэжэ байдаг оньһото түхеэрэлгэнүүд нэбтэрһээр үнинэй. Уржа үдэшэ Алексей Цыденов сурбалжалагшадаа мэргэжэлтэ һайндэрөөрнь амаршалаа. Сугларһан 100-гаад хүнэй, диилэнхи олониинь залуухан хүбүүд, басагад. Иигээд лэ саг – засаг гэжэ холбуулалай яаха аргагүй шэрүүн хүсэн ба үнэниинь баталагдана. Арбан жэл соо Буряадай мэдээсэлэй нюур танигдашагүйгөөр хубилшаба. Уластахи ажаһуугшадай ниитын бодол, һанаа, найдал, эрмэлзэл болбосоруулжа ябаашад, саарһа гуурһа холо орхинхой, гар утаһанай аргаар хизааргүй оршолондо амидарна. Хоёр-гурбан үе холбожо ябаһан Баясхалан Дабаин, Александр Фарфутдинов мэтэ зон энэ “улаан бургааһадай” дунда ёһотой түүхэтэ үлэг гүрбэл мэтэ үзэгдэнэ. Теэдшье үнэн үгын жэнхэни сэн мэдэхэ зон эдэл ябанал даа.
Түгэсхэлэй орондо
Нэгэтэ һая танилсаһан прокуратурын залуу мэргэжэлтэн иимэ ушар хөөрөө һэн. Нэгэ эрилтэ ехэтэй заагшань һая бии болоһон компьютер дээрэ мүрдэлгын саарһа бэлдэхыень огто хорёо. Ушар юуб гэхэдэ, үгэеэ сэгнэнэгүйт гээд, урданайхяараал хургаараа тоншодог бэшэлгын машинка ашаглуулагша һэн ха. Энэньшье зүйтэй юм гү, удха түгэлдэр үгын ашаар хүн зоной хуби заяа хубилгамаар ха юм гэжэ дүүргээгшэ һэн хөөрөөгөө. Тиимэһээ эдэ хоёр мэргэжэлэй һайндэрнүүд зэргэлээд байжашье болоо.