Бэшэг, ном хэзээдэ мүнхэ

Заншалта ёһоороо жэл соо хэблэгдэһэн сэдхүүлнүүд, номууд болон бэшэшье толилолгонууд дэлгэгдээ, аудио-номууд шагнагдаа, фильмүүд харуулагдаа. Хоёр үдэрэй туршада үзэсхэлэнгүүд дэлгэгдэжэ, яармагууд хүдэлжэ, Буряад ороной, Үбэр Байгаалай хизаарай, Эрхүү можын хэблэлэй эмхинүүд өөһэдынгөө сэнгүүдээр хэблэһэн зүйлнүүдээ худалдаа; шэнэ номуудтай танилсалганууд, зохёохы уулзалганууд, дүхэриг шэрээнүүд, асуудал-харюугай нааданууд үнгэргэгдөө. Уригдаһан айлшад һонирхолтой элидхэлнүүдые уншаа, мастер-хэшээлнүүдые үнгэргөө. Мүнөө жэл 90-дэхи жэлээ угтажа байһан Буряадай Уран зохёолшодой холбооной баярай суглаан үнгэрөө. Мүн лэ Буряад Уласта хэблэлэй хэрэгые эдэбхижүүлхэ болон эрхим номуудые элирүүлжэ, хэблэлые болон уран зохёолшодые урмашуулха зорилготой «Жэлэй эрхим ном» гэһэн мүрысөөнэй дүнгүүд согсологдоо.

Номой найрые Пётр Чайковскиин нэрэмжэтэ Буряадай урлалай колледжын оюутад буряад-монгол аялга хүгжэм морин хуурнуудаараа уянгатуулан хангюурдажа, сугларагшадай сэдьхэл хужарлуулжа, XXIX Номой дугылан үнэхөөр номой ехэ һайндэр гэжэ гэршэлэн эхилээ.

Мүн лэ найрай нээлгэдэ хабаадаһан Буряад Уласай Засагай газарай Түрүүлэгшын орлогшо, элүүрые хамгаалгын сайд Евгения Лудупова, соёлой сайд Соёлма Дагаева болон Буряад Уласай Толгойлогшын ба Засагай газарай Захиргаанай хүтэлбэрилэгшын орлогшо Ирина Доржиева 29-дэхиеэ үнгэргэгдэхэеэ байһан Номой дугыланай найрай нээлгэнээр халуунаар амаршалхадаа, энэ хэмжээ ябуулгын туйлай ехэ удха шанарые онсолон тэмдэглээ. Харин хүндэтэ айлшан Зүүн зүгые, илангаяа Хитад ороной уран зохёол шэнжэлэгшэ Алексей Маслов үгэ хэлэхэдээ: «Энэ дэлхэйдэмнай бүхы юумэн хубилжал байдаг, хүсэн түгэс гүрэн түрэнүүдшье үгы болодог, тиигээшьегүй бол, үндэһөөрөө хубилжал, засаг зургаанууд һэлгэлдэжэл байдаг, харин ном, бэшэг мүнхэ хадагалагдаха, - гэжэ эхилээ. - Мүнөө сагта хуу юумэнүүдэй оньһожоруулагдаһаар, сахим холбоогоор хангагдаһаар уламжалан, барлагдаһан хэблэлнүүд түригдэжэ, хойшоо гарахань гэжэ зариманай хэлэһэндэ бү этигэгты. Хүмүүн түрэлтэнэй эгээл ехэ баялигынь номууд болоно, юундэб гэхэдэ, мүнөө хүрэтэр манда хүрэжэ ерэһэн туйлалтанууд номуудаар лэ дамжажа ерээ ха юм», - гэжэ Алексей Александрович тобшолол хээ.

«Газар дэлхэй – манай бултанай гэр»

«Маанадай - хүмүүн түрэлтэнэй бэшэ бүхы зүйлэй амитадтай ажамидардаг, ажаһуудаг бүмбэрсэг дэлхэй бултанай нэгэ ехэ гэрынь болоно», - гэжэ «Планета Земля - наш общий Дом» гэһэн номтой танилсалгын үедэ авторынь - Владимир Шаглахаев тэмдэглээ.

«Хүхэ мүнхэ Эсэгэ тэнгэримнай, Үлгэн ехэ Эхэ дэлхэймнай, орон ехэ Хангаймнай!» - гэжэ мүнөөшье арад зомнай мүргэн шүтэнэ ха юм. Тиигэжэ Эхэ байгаалитаяа хүйһөөрөө холбоотойбди гэжэ хүн бүхэн ойлгодог байгаа. Энэ холбоогоо таһалһан хүн оршон тойроной бодото байдалые ойлгохоёо болижо, гансал эд зөөридэ обтожо, засаг барихаяа дүүлижэ мухардана. Тиимэ хүн гэр бүлэеэшье тоохоёо болижо, уг унгияа үндэһөөрнь үгы хэхэ туйлдаа хүрэнэ...

Түнхэнэй аймагай Хуурай Хобогто түрэһэн, Аршаан тосхондо оршодог Хойморой (Хандагатайн) «Бодхидхарма» дасанай шэрээтэ Владимир Аюшеевич Шаглахаев (олоной дунда Даша лама гэжэ алдаршанхай) арбатайһаан шажан мүргэлөөр, түүхэ домогуудаар һонирхожо эхилһэн юм. Тэрэ будаадын шажанай ном һургаалнуудта «Бодхидхарма» дасанда болон Санкт-Петербургын Гүнзэчойнэй хиидтэ сэсэн мэргэн багшанарай шабяар һуража гараһан гэжэ мэдээжэ.

Энэ номоо Владимир Шаглахаев иимэ ехэ удхатай, уран зурагуудтай, хоморой шухаг гэрэл зурагуудтай бултанда һонирхолтой ном болгохын тула хэдэн удаан жэлнүүдтэ хамсыгаа шуужа оролдоһон байха даа. Ганса урдын домогуудые хадуужа ябаһан хүнииешье мүнөө үедэ олохо гээшэмнай хүндэхэн хэрэг.

Имагтал буурал сагаан Мүнхэ Һарьдагтаа түшэглэн, uушан гурбан мундаргануудтаа үлгыдүүлэн Даша ламбагаймнай түүхэ домогуудаа домогложо байһаниинь мүнөө сагта гүн ехэ удхатай болоно гэжэ Ахын аймагай һунгамалнуудай Зүблэлэй түрүүлэгшэ Владимир Григорьевич Аюшиев тэмдэглээ. Түнхэн голоймнай суута эрдэмтэй шэдитэ лама багшанар, бар хүсэтэ баатарнууд, мэргэн түргэн зон мүнөөнэй юрын бэшэ үедэ хүн зондоо жэшээ болохо ёһотой.

Тиихэдэ уран зураашадые һонирхуулжа, ямар нэгэн үйлые уран зурагай хүсөөр тобойлгон гаргуулха гээшэмнай өөрөө ехэ хүндэтэй байха ёһотой. Буряад орондоо мэдээжэ Чингиз Шонхоров, Солбон Лыгденов, Даша Лыгденов, Жаргал Зомонов болон Монгол ороной П. Цэгмид, Ш. Сайнзул болон Ц. Оюун-Эрдэнэ гэһэн уран зураашад хабаадуулагдаһан байна. Тиигэжэ энэ номынь гүн ехэ удхыншье, уран хурса хэлэнэйшье, гоё һайхан шэмэглэлэйшье, тааруу зохид хэблэлэйшье - бүхы талаараа эрхим номуудай нэгэн болоо.

Мүнөө сагта туйлай ехэ ажал эбээн тэдхэгшэдэй туһагүйгөөр бүтэхэгүй гэжэ мэдээжэ. Номтой танилсалгын түгэсхэлдэ Владимир Аюшеевич Шаглахаев номоо хэблэхэдэнь туһалһан Цанид-Хамба Агван Доржиевай бүлэ аша Цэцэн Зантавта, номой эрдэмтэ редактор Н.Д. Болсохоевада, эрдэмтэд Н. А. Улзытуева ба Б.П. Бильдуевада, барилгын «БестПлюс» эмхиин ахамад захирал В.Н. Байминовта, Үндэһэтэнэй түүхын музейдэ, Үндэһэтэнэй номой санда гээд лэ, үетэн нүхэдтөө, нютагаархидтаа халуун баяраа мэдүүлжэ, амаршалгануудыень тогтоожо байна һэн.

Хүндэтэ Даша ламбагайе бидэшье шэнэ номоорнь, ехэ амжалтаарнь халуунаар амаршалаад, ном тухайнь «Буряад үнэнэй» нюурнуудта үшөө нэгэнтэ бэшэ толилолгонууд гараха гэжэ найдуулая.

«Золтой хүн»

Иигэжэ нэрлэгдэһэн зохёохы үдэшэ Номой дугыланай хэмжээндэ үнгэржэ, Буряад Уласай болон Орос гүрэнэй уран зохёолой алтан жасада ялас гэмэ хубитаяа оруулһан мэдээжэ уран зохёолшон, ирагуу найрагша, драматург Шираб-Сэнгэ Бадлуевич Бадлуевай түрэһөөр 100 жэлэй ойдо зорюулагдаа.

Шираб-Сэнгэ Бадлуевич нютаг нугадаа, түрэл арадтаа болон Эхэ орондоо аргагүй дуратай байжа, зохёолнууд соогоо магтан түүрээхые оролдоһон байдаг. Тэрэнэй эгээл эдеэшэг, түлэг зохёохы хаһань 1950-яад онуудһаа 1980-яад онуудай хугасаада тудаа. Энэнь Буряадай түүхэдэ, соёл урлалай һалбарида туйлай ехэ хүгжэлтын болоһон «алтан үе» гэжэ дэмы нэрлэгдээгүй.

«Золтой хүн» номой шэнээр хэблэгдэһэнэй баярта ушараар «Буряад үнэн» Хэблэлэй байшанай захирал - юрэнхы эрхилэгшэ Даши-Доржо Болотов агуу зохёолшын зохёохы замые хөөрэхэдөө, «Буряад үнэнэй» бэрхэ сурбалжалагша байһаниие онсолон тэмдэглээ. Буряадаймнай элитэ ехэ уран зохёолшод «Буряад үнэндэл» хүдэлхэдөө, гуурһаяа мүлижэ, уран захатануудаа бүтээжэ эхилһэн ха юм даа.

Шираб-Сэнгэ Бадлуевай шүлэгэй үгэнүүдээр зохёогдоһон «Зугаалай» гэжэ дууе Буряадай арадай, Оросой габьяата зүжэгшэн Дамба-Дугар Бочиктоев ирагуу гоёор гүйсэдхэжэ, дурсалгануудаараа хубаалдажа, сугларагшадай сэдьхэлые хайлуулаа. Тиигээд үшөө тэрэ үеын залуушуулай дуратай дуунуудай нэгэн болоһон «Анааһаа аляархан Хандама» гэжэ дуугаар бултаниие хүхеэгээ.

Эндэшье морин хуурай уянгата хүгжэм Арюун Гоа зэдэлүүлжэ, сугларагшадай сэдьхэлые ханаагаа.

Уран зохёолшын түрэл гаралнуудай зүгһөө Бато-Болот Содномович Бадлуев, Ардишиди Жамсаранович Будажапов гэгшэд нагаса абаяа, хүгшэн абаяа, хадам абаяа һайн һайханаар дурсажа, энэ зохёохы үдэшые эмхидхэжэ үнгэргэһэн зондо, сугларагшадта халуун баяраа хүргөө.

«Дуун дуран хоёроо зэдэлүүлһээр»

Иигэжэ нэрлэгдэһэн уран зохёолой үдэшэ Ярослав Гашегай нэрэмжэтэ сэдхүүлшэдэй, Исай Калашниковай нэрэмжэтэ уран зохёолшодой шангуудай лауреат, Буряадай арадай поэт, Буряадай болон Оросой соёлой габьяата хүдэлмэрилэгшэ Галина Базаржапова-Дашеевагай зохёохы замай 50 жэлэй ойдо зорюулагдаа.

Тус хэмжээ ябуулга Галина Базаржаповагай «Магтаал» гэһэн шүлэгөөр эхилээ. Тэрэнь Ажалай Улаан Тугай орденто «Буряад үнэн» сониной 100 жэлэй ойе Буряадай Оперо ба баледэй театр соо тэмдэглэһэн баяр ёһололой һайндэртэ Оросой арадай зүжэгшэн Михаил Ёлбоновой уянгатуулһанаар (ямар һайнаар тиихэдэ бэшэгдэжэ абтаһан байгааб!) зэдэлхэдээ, сугларагшадай сэдьхэл зүрхые долгилуулан уяруулаа. Баһал уласхоорондын дуушадай урилдаанай лауреат, Буряадай Оперо ба баледэй театрай гол дуушан Жамса Бамбагаевай «Эртымни дуран, бусыш даа» (хүгжэмынь Пүрбэ Дамирановай) гэһэн дуу хангюурдахадань, хэнэй сэдьхэл уярангүй байхаб? Мүн лэ Улаан-Үдэ хотын 54-дэхи һургуулиин болон Эдиршүүлэй урлалай 8-дахи һургуулиин уран хэлэтэй шабинарай «Хаанаб даа, нэгэ һайхан орон бии...» гэжэ аалин аятайханаар эхи татан, Галина Базаржаповагай уран зохёолнуудаар «Зүүдэн» гэһэн найруулга олоной урда уран гоёор сээжээр зэдэлүүлжэ байхадань, шагнажа һууһан «буряад эльгэтэй» хүн бүхэнэй омогорхоогүйдэ аргагүй: иимэ бэрхэ үхибүүдэй байһан хойно түрэлхи буряад хэлэмнай хэзээдэшье хосорхогүй, уран һайхан зохёолнай хожорхогүй гэһэн бата найдал түрэнэ.

Буряадай Уран зохёолшодой холбооной түрүүлэгшэ Сергей Доржиев: «Галина Хандуевнатай нэгэ үе «Буряад үнэндөө» эб хамта хүдэлөө һэмди. Тэрэ гэһээр хани харилсаамнай бүрил бүхэжэхэһөө гадна таһаршагүй холбоотой», - гэжэ мэдүүлээд, мүнөө үеын элитэй поэдэй (поэтесса гэхэдэ, юрэнь таарахагүй шэнги) эршэтэй зохёохы зам тухай хөөрэжэ үгөө. «Буряад үнэнэй» эрхилэгшэ байһан, Хэблэлэй байшангые хэды жэл соо захирһан хэлэ бэшэгэй эрдэмэй дид-доктор Туяна Самбялова эб хамта хүдэлжэ ябаһан гуурһа нэгэтэ нүхэрэйнгөө уран зохёолнуудые эдэ жэлнүүдтэ шэнжэлжэ байһан тухайгаа хөөрөө. Туяна Владимировнагай шэнжэлэлгэнүүд «Буряад үнэндэмнай» толилогдохо.

Галина Базаржаповагай зохёолнуудай энэрил хайра түрүүлдэгые, арадай заншалда түшэглэһые хэлэ бэшэгэй эрдэмэй доктор Лариса Бадмаева онсолон тэмдэглээ. Галина Хандуевна Луу жэлдэ, Луу һарада 1-дүгээр һойһо угтай хадаа хойшоо таталдахагүй, гэдэргээ эрьелдэхэгүй, сухаришагүй зантай, мүхэшэгүй зоригтой гэжэ тэрэ тобшолол хэбэ. Иимэ уран нарин, шуран бэрхэ, урагшаа һанаатай хүнтэй нэгэ сагта ажаһууха гээшэмнай – манай зол.

Тиигэбэшье... Юундэ «тиигэбэшье» гэхэдэ, Галина Базаржапова-Дашеевагай зохёохы зам «Буряад үнэнһөө» эхитэй юм. Буряад ороноймнай хэдэн үе олон түмэн уншагшад Галина Дашеевае «Буряад үнэнэй» сурбалжалагша гэжэ нэн түрүүн мэдэнэ ха юм даа. Урдахи зуун жэлэй 1974 ондо Доржи Банзаровай нэрэмжэтэ, Ажалай Улаан Тугай орденто Буряадай гүрэнэй багшанарай дээдэ һургуули түгэсхэһэн, заха холын Захааминай Үлэгшэн тоонтотой гүлмэр залуухан Галина Дашеева «Буряад үнэн» сониной сурбалжалагшаар ажалда абтаһан холын түүхэтэй. Тэрэ гэһээр тэбхэр тэгшэ 50 жэл - хахад зуун жэл - ходорон үнгэршэбэ! Тиигэбэшье (баһал «тиигэбэшье») Галина Хандуевна түрэл «Буряад үнэндөө» үнэн сэхээр алба хэһэн зандаа. Үшөө хажуугаарнь «Байгал» сэдхүүлээ эрхилнэ.

«Дүрөө дээрээ»

- Үнэн сэхэ, ажалша бэрхэ, урагшаа һанаатай аха заха сурбалжалагшамнай - эрхим хүндэтэ Галина Хандуевнамнай бултандамнай жэшээ боложо, «Үнэнэйнгөө» тугые дээрэ үргэжэ, Хэблэлэйнгээ байшангай хии мориие өөдэнь хиидхэжэ, «дүрөө дээрээ» ябанал даа, - гэжэ аха нүхэрөөрөө омогорхожо байһанаа «Буряад үнэн» Хэблэлэй байшанай захирал -ахамад эрхилэгшэ Даши-Доржо Найманович Болотов бултанда мэдүүлээд, мүнөөнэй заншалаар бамбагар ехэ баглаа сэсэг барюулаа.

Харин урдань «Буряад үнэнэй» эрхилэгшэ байһан мэдээжэ уран зохёолшо-прозаик Цыдып Цырендоржиев: «Галинаһаа нэгэ заа ахашье һаа, мүнөөшье бэшэһэн зандааб, хэды тиигэбэшье Галина Хандуевна шэнги 50 жэл «Үнэндөө» хүдэлжэ ябанаб гэжэ хэлэхэ аргагүй байһандаа шаналнаб», - гэжэ мэдүүлээ. Эгээл шэлдэг наһанайнгаа 33 жэлые «Буряад үнэндөө» үгэһэн Бэлигма Орбодоева Галина Хандуевнагайнгаа нарин хүтэлбэри доро удаан хүдэлһэнөө хөөрэхэдөө, өөрөө ехээр шогложо ябадагшьегүй һаа, «Буряад үнэнэйнгөө» шогуудые наринаар хадуужа ябаһанаа найруулжа, ном болгожо гаргажархиһыень бахархан тэмдэглэжэ, нэгэ-хоёр хөөрөөень хэлэжэ, сугларагшадые энеэлгэжэ баярлуулаа. Тиигээд Дымбрыловтэнэй гэр бүлын ансамбль Галина Хандуевнагай уянгата «Наһанай намар» гэжэ дууе ходо харагшадтаа бэлэглэжэ ябаабди гээд, тэрэ дуунайнгаа бадаг омогтойгоор гүйсэдхөө.

Хоца Намсараевай нэрэмжэтэ Буряад театрай музейе даагша, культурологиин эрдэмэй дид-доктор Валентина Бабуева хайшан гэжэ түрэл Буряад театр болон мэдээжэ ехэ-ехэ зүжэгшэд тухайгаа түсэлнүүдые Галина Хандуевнатай хамта зохёон байгуулдагаа хөөрэжэ үгөө.

2700-һаа үлүү

Үшөө нэгэ ехэһээ ехэ баярта үйлэ хэрэг гэхэдэ - “Галина Базаржапова-Дашеевагай уран зохёолнууд” / “Библиографический указатель Галины Базаржаповой-Дашеевой” гэһэн Галина Хандуевнагай энэ 50 жэл соо бүтээһэн 2700-һаа холо үлүү зохёол найруулганууд тоологдон нэрлэгдэжэ, бүхэли ном боложо хэблэгдээ.

Энэ туйлай ехэ ажалые номой сангай ажалшад дабажа гараа гэжэ тэмдэглэхэ хэрэгтэй. Үндэһэтэнэй номой сангай хизаар ороноо шэнжэлэлгын таһагай Юлия Ванчикова Норжима Лубсанова хоёр ехэ ажал ябуулаа гэжэ ойлгосотой. Харин Исай Калашниковай нэрэмжэтэ хотын түбэй номой сангай Любовь Гомбоева Дарима Васильева хоёр эхи табяа юм гэжэ тэрэ номой сангай хизаар ороноо шэнжэлэлгээр болон аяншалгаар мэдээсэлэй таһагай мэргэжэлтэн Ирина Поняева хөөрөө.

Уран зохёолой үдэшын үнгэржэ байха үедэ «Буряад үнэнэй» дизайнер Аркадий Батомункуевай уран гоёор, нарин нягтаар үлхэн байжа нягтаруулан бүтээһэн «50 жэлдэ – «Буряад үнэндэ» гэһэн видео-буулгабари үргэн экранда харуулагдажа байгаа. Эндэ Галина Хандуевнагай 50 жэл соо «Буряад үнэндөө» хэды гээшын олон зоноор харилсан нүхэсэжэ ябаһаниинь тодоор харуулагдана.

Зүблэлтэ гүрэнэйнгөө ниислэл Москвада, Орос Уласайнгаа орьёл хадата Кавказда, талын элһэтэ Хальмагта, лалын шажанта Башкортостанда, Татарстанда, саһан сагаан Яхадта, Алтай ехэ хизаарта, Монгол сайхан орондо үнгэрһэн уран зохёолшодтой уулзалгануудта хабаадаһаниинь; Буряад оронойгоо бүхы аймаг нютагуудаар сурбалжалагшынгаа хүнгэн бэшэ ажалаар ябаһаниинь домоглогдоо. Үнэхөөр домог болохо хүнэй наһан, ажал хэрэг!

Хараа муутай зон уншаха аргатай болобо

Баһа үшөө нэгэ туйлай ехэ дэмбэрэлтэ үйлэ Буряад орондо болоо: энэл үдэрэй үдын урда Буряадай Үндэһэтэнэй номой сангай ажалшад «Түрэл хотымнай уран зохёолой аялга» гэһэн түсэлтэй уншагшадаа танилсуулаа.

Тус түсэл Улаан-Үдэ хотын Зүблэлэй һунгамалнуудай дурадхалаар байгуулагдаа. 2023 оной эсэстэ арадай түлөөлэгшэд Үндэһэтэнэй номой санда хүрэжэ, эрэмдэг бэетэй эрхэтэдтэ алба хэхэ таһагые ехэтэ һайхашаагаа бэлэй. Тэндэ һунгамалнуудта хараа муутай зондо аудио-номуудай хайшан гэжэ зохёогдодог тухай хөөрөө. Харамтайнь гэхэдэ, буряад хэлээр аудиономууд байгаагүй. Хотын Зүблэлэй Түрүүлэгшын орлогшо Анатолий Белоусов хотын Зүблэлэй Залуушуулай танхимда энэ асуудал шиидхэхэ тухай дурадхал оруулһан байна.

Тэрэнэй дүнгөөр Залуушуулай танхим Үндэһэтэнэй номой сантай хамта «Түрэл хотымнай уран зохёолой аялга» гэһэн түсэл зохёожо, грантын тэдхэмжэдэ хүртөө. Тиигэжэ Буряадай уран зохёолшодой зохёолнуудые хараа муутай зоной дунда дэлгэрүүлхэ зорилготойгоор аудио-номуудые зохёожо, мэдээсэлэй нөөсэнүүдтэ, номой сангуудта болон соёлой бусадшье эмхинүүдтэ тарааха гэһэн ажал ябуулагдана.

Тус түсэлэй хэмжээндэ түрүүшын гурбан ном дуугаргагдаа: Сергей Доржиевай «Сарюухан сагаан сахюусамни», Галина Базаржаповагай «Буусын һургаал» болон Доржи Сультимовай «Эхын захяа». Эдэ зохёолнуудые Буряадай арадай, Оросой габьяата зүжэгшэн, Оросой Уран зохёолшодой холбооной гэшүүн Доржи Сультимов болон Буряадай арадай зүжэгшэн Туяна Бальжанова гэгшэд уран гоёор уншана. Эдэ бэрхэ зүжэгшэдэй уран зохёолнуудые аман хэлэнэй элдэбын уран аргануудые хэрэглэжэ, хоолойн һайгаар бүдүүнээр хашажа, наринаар уянгатуулжа, хэрэгтэй газарнуудтань тогтожо гү, али утаар татажа байгаад, тон ехэ уранаар уншахые шагнажа байхада, ямаршье хүндэ һонирхол түрүүлнэ. Энэ ехэ ажал буряад уран зохёолдо шэнэ алхам боложо үгэбэ гэхэдэ, алдуугүй хаш - үрэ дүнгынь мэнэ һаядаа тобойжо мэдэгдэхэ.

Илангаяа манай Галина Хандуевнагай «Буусын һургаалнуудые» шагнажа һуухадаа, сэдьхэлнай ямар ехэ урма баяраар халина гээшэб!

Энэ хэмжээ ябуулгада хабаадаһан Улаан-Үдын Зүблэлэй Ниигэмэй хорооной түрүүлэгшын орлогшо, СВО-до хабаадаһан Михаил Бошолов ехэ һайн түсэл гэжэ тэмдэглэхэдээ, энэ ажалые саашадаашье дэмжэжэ байхаяа мэдүүлээ.

Аудио-номууд «Библиотека AV3715» гэһэн Оросой хараа муутайшуулай субагта табигданхай. Буряад орон тэндэ анха түрүүшынхиеэ буряад хэлээр аудио-номуудаар түлөөлэгдэбэ. Мүн баһа Буряадай сахим номой сан соо эдэ номуудые оложо болоно.

Хүндэтэ Галина Хандуевнагаа бүхы баярнуудаарнь үшөө дахин халуунаар амаршалаад:

Пегастаа шанга гэгшээр мордоод, эмээлһээнь хуурангүй, дүрөөһөөнь буунгүй; «Буряад үнэндөө» гуурһаяа хатаангүй, «Байгалаа» бамбайлгажал, бидэ бүгэдэндөө замай залуур, харгын жолоо боложо, урагшатай урматай ябыт даа гэжэ хүндэтэйгөөр хүсэе!