Дульваа хамбын субаргын найр

Гэгээрэлэй ажалда ехэ габьяатай, үзэг бэшэг мэдэхэгүй зо­ниие һургаһан, компартиин ажал­да шалгарһан тусхай 50 жэлдэ зорюулагдаһан медальтай, алдар суута эсэгынь, гушад угтай байһан Цы­ретор Раднаевич Раднаевай (түрэл тоонтынь нэгэ үйлсэдэнь нэрэ, обо­гынь үгтэнхэй) 120 жэлэй ойн баярай ехэ һайндэр Асагадта үндэр хэмжээндэ үнгэргэгдэжэ, бидэ, “Тоон­то” ансамблиинхид, ехэ дуратайгаар тэндэ хабаадаа, дуулалдаа бэлэйбди.

Энэл аймагай олон хүдөө нютагуудаар ажаһууһан, Ивалгын гол даса­нуудта аша буянтай ажал бүтээһэн 7 хамба ламанарай түрэһэн ню­тагуудта ехэ гоёнууд субарганууд бүтээгдэнхэй, тэдэнэй дэргэдэ удаа дараалан тоонтодонь ехэ, удха түгэлдэр маани, мэгзэмэй уншал­ганууд саг үргэлжэ үнгэргэгдэжэ, олон хүн зон, түрэл нютагаархидынь эдэбхитэйгээр хабаадажа байдаг юм. Загарайн Шэнэ-Бууса нютагһаа гарбалтай Дульваа хамба Түбдэн- Нима Чойдоновто зорюулагдаһан субаргын дэргэдэ (зургаадахи хам­бын хүндэлэлдэ) ехэ хуралай ун­шалгануудые Шулуутайн дасанай ламанар эмхидхэжэ, загарайнхид, шэнэ-буусынхид олоороо сугларжа, ерээдүйн һайн ажаһуудалайнгаа, үри хүүгэдэйнгээ, ашанар, зээнэрэйнгээ, өөһэдынгөө түлөө мүргэбэ, һүгэдэбэ, һанаһан хүсэлөө бэелүүлбэ, обоогойнгоо найр нааданда эдэбхитэйгээр хабаадаба.

 Хормейстер С.Намжилон Н.Мосорова-Цыреноватай

Дульваа хамбада зорюулагдаһан маани, мэгзэмүүдэй уншалгануу­дые эмхидхэлгэдэ Мария Дашини­маевна Норбоева хүсэл оролдолго гаргаһан, нютагаархидаа суглуулһан байна. Харин спортын зүйлнүүдээр мүрысөөнүүд Бэлигто Геннадьевич Раднаевта даалгагдаа. Бүхэ барил­даагаар Хэшэгто Раднаев абсолют­на чемпион боложо, Шулуутайн да­санай хонин бэлэгтэ хүртэбэ. Кон­церт-наадыень Оксана Тушинова хүтэлбэрилһэн байна. Шэнэ-Буусын соёлой байшангай уран һайханай хүтэлбэрилэгшэ Эржена Норбое­ва хэлэхэдээ: “Булта оролдон, энэ һайндэрэйнгээ найруулгые зохёо- гообди”, - гэжэ тэмдэглэнэ һэн. “Шэнэ буусын” гимнын дууе (үгэнь Екатерина Цыбиковагай) авторынь, суута “Үетэн” бүлэгэй (Хэжэнгэ) уда­ридагша, композитор, РФ-гэй соёлой габьяата хүдэлмэрилэгшэ Баяр Шой­доков аргагүй гоёор гүйсэдхэжэ, ха­луун альга ташалгаар угтагдаа, хүхэ номин хадагта хүртөө:

...Түрэл тоонтоёо бусахадам,

Түбдэн-Нимын субарга үршөөдэг,

Мүнөө эжын шарай һанан,

Мунхан эжыдээ зальбарнаб.

Дабталга:

Шэнэ-Бууса, Шэнэ-Бууса

Шэдитэ минии түрэл нютаг.

Шэнэ-Бууса, Шэнэ-Бууса,

Шамаяа ходол һанан ябанам...

Бэлигтэй хормейстер, компози­тор, Ураалай консерватори дүүргэһэн Светлана Намжилоной хүтэлбэрилдэг дуунай хоёр коллектив, нэрлэбэл, Улаан-Үдэһөө ерэһэн олондо мэдээжэ арадай аман зо­хёолой “Тоонто” ансамбль, тиихэ­дэ Хани барисаанай байшангай “Соёл” бүлгэмэй дэргэдэхи “Дуунай аялга” гэһэн дуу гүйсэдхэдэг бүлэг бэлэг дуунуудаа бариба. “Тоонтын­хидай” зохидоор гүйсэдхэһэн “Сэ­сэглэн һалбараа Улаан-Үдэм” (хүгж. С.Намжилоной, үг. Ц.Дубчиновагай), урданай “Гоё гээшэнь” (анхан энээн- дэ һургаһан, хормейстер байһан Соёлма Цыреновна Чимитовагай эжынь дуратайгаар дууладаг дуу- ниинь байгаа), мүнөө үеын “Ню­тагнай” гэһэн дуунууд олондо һайшаагдаа. Тиихэдэ дуунуудые бэ­шэдэг, өөрөө үгэнүүдыеньшье зо­хёодог, баһал гоёор дууладаг онсо бэлигтэй Наранзая Мосорова-Цыре­новагай “Буряадай...” гэһэн дууе “дуунай аялгынхид” бэрхээр дуулаһан байна. Загарайн Эрхирэгэй ветера­нуудай ансамблиинхид баһал бэлиг­тэй дуушад байһанаа эндэ гэршэлбэ.

Аша буянтай энэ һайндэр үндэр хэмжээндэ июлиин 9-дэ үнгэрбэ гэжэ шэнэ-буусынхид сэгнээ, булта үглөөдэрынь баясаа. Юуб гэхэдэ, ию­лиин 9 хүрэтэр аргагүй шангаар на­ран шаража байһан аад, үглөөдэрынь аадарай ехээр адхаржа эхилхэдэнь: “Тэнгэриимнай бурхад, нютагайм­най эзэд, сабдагууд бидэнээ дэмжэ­бэ, таряа талхамнай, үбһэ хулһамнай, ургасамнай ургахань, ажабайдал­най һайжархань гээшэ”, - гэжэ бул­та зон хүхилдэбэ, арад зонойнгоо түлөө ашата буянтай, бурхантай ажал ябуулһан Дульваа хамбаараа омо­горхон байһанаа мэдүүлбэ.