Дара эхын һургаалда хүртөө

- Сагаан Дара Эхын һургаал үнгэргэхын тулада ехэ бэлэдхэл ябуулагдаа. Урид бидэ Дээдэ Онгостой­до оршодог Дуйнхор дасанай лама­нартай элһэн мандала урлан бай­гуулаабди. Тиигээд мандалые бай­гуулгын һүүлшын үдэртэ ута наһа үршөөдэг сэдьхэлэй түгшүүрилтэй зондо туһалдаг Сагаан Дариха бо­дисада тухай хөөрэжэ үгэхэ гэжэ шиидээбди. Мүн баһа тусхай гури­мууд үнгэргэгдэжэ, байгуулагдаһан мандала һандаргагдаа. Мандалын элһэ хүн зондо һахюуһан болохоор тараанабди. Мүн лэ ямар нэ­гэн үбшэнһөө эдэгэхэеэ энэ элһэ уһанай эзэдтэ («Лусад» тахиха үедэ) үргэжэ болохо, - гэжэ Буддын ша­жанай «Даша-Чойнхорлин» ехэ һургуулиин захирал, буддын ша­жанай гүн ухаанай доктор геше лама Дымбрыл Дашибалданов тэмдэглээ.

Тэрэ мүн лэ Бурхан баг­шын һургаалые ойлгожо, тэдэ мэдээнүүдээ ажабайдалдаа туһатайгаар хэрэглэхэ арга болоно гэжэ шухалыень тэмдэглээ.

Буддын шажанда Сагаан Дара Эхэ бүхы Буддануудай үйлэ хэрэгүүдые бэелүүлжэ байдаг. Тэрэ 7 нюдэ­тэй: зургаан нюдөөрөө Сансарын 6 түбиие харана - 3 буянта һайн түрэлэй болон 3 муу нүгэлтэ түрэлэй, харин долоодохи нюдөөрөө бүри алад саашань гэтэлгэнэ. Россиин буддын шажантан гүрэн түрынгөө хүтэлбэрилэгшэдые Сагаан Дарихын хубилгаантай жэшэдэг. Хатан хаан Елизаветэһээ эхилжэ, хайрын сэдь­хэлтэй, туһалха хүсэлтэй энэ боди­садын хубилгаанууд гэжэ российска императорнуудые жэшэдэг байһан.

Сагаан Дара Эхын һургаалда байһан хүн бүхэн дээдын адиста хүртэнэ. Сагаан Дара Эхэ – ута наһа үршөөдэг бурхадай нэгэн. Һургаалай түгэсхэлдэ ута наһа үршөөдэг тусхай «Цэдо» уншагдаа. Удаань ажабайдал гээшэ саг зуурын лэ үзэгдэл гэжэ гэр­шэлхэеэ Сагаан Дарын мандала та­раагдадаг. Мандалые бүтээһэн элһэн адис боложо, һургаалда хүртэһэн хүн бүхэндэ тараагдана.

- Бидэ Ярослав хүбүүнтэеэ Улас­хоорондын будаадын шажантанай хуралдаанда хабаадахаяа зорюута Москваһаа хүрэжэ ерээбди. Эндэ ха­баадаха аргатай байһандаа ехэ ба­яртайбди. Хуралдаанай үедэ Сагаан Дара Эхын лүн табигдаха юм гэжэ долоон хоногойл урда тээ мэдээ- бди. Тиигээд лэ мүнөөдэр ниидэжэ ерэһээр лэ, аэропортһоо сэхэ эндэ ерээбди. Эндэ байхадамнай, ман­да ехэл һайн, сэдьхэл тэнюун байна, эндэ хүнүүд һайн һанаатай, юушье ойлгуулхаар, туһалхаар бэлэн, - гэжэ һургаал хүртэһэн Москвагай айлшан Екатерина сэдьхэлээ хүдэлгэһэн бо­долнуудаараа хубаалдана.