Залуу бүлэнүүд гэр байратай болоно

 - Иимэ олон үхибүүдые хаража баярланаб. Энэ зүб, үхибүүд олон байха ёһотой. Зол жаргал худалдажа абахагүйбди. Зол жаргал­най үхибүүдтэ. Тиимэһээ манай уласта жаргалтай бүлэнүүдэй олон боложо байхыень хүсэнэб. Юрэнхы­лэгшын дэмжэлгээр, тэрэнэй даабаряар бэелүүлэгдэжэ байһан үндэһэтэнэй түсэлнүүдэй ашаар манай багашуулые хүгжөөхэ тааруу зохид байдал түхеэрэгдэнэ, элүүрые хамгаалгын, тами­рай ба соёлой объектнүүд баригдана, тэрэ тоодо залуу бүлэнүүдэй гэр байрын асу­удал шиидхэгдэнэ. Таанадые бултыетнай амаршалнаб. Ажабайдалтнай һайн бай­хань болтогой, - гэжэ Алек­сей Цыденов амаршалба.

Үхибүүгүй залуу бүлэнүүд ниигэмэй түлбэриин ашаар гэр байрын үнэ сэнгэй 30 хубиһаа бага бэшыень түлэхэ аргатай, харин үхибүүтэй бүлэнүүд – 35 хубиһаа бага бэшэ. Программада 35 хүрэтэр наһатай бүлэнүүд хабаадана.

- Гэр байрын ээлжээндэ 2021 ондо гээшэ һэн гү, али 2022 ондо орообди. Бидэ олон үхибүүдтэйбди. Бэлэн гэр абаха һанаатайбди. Өөһэдөө гэр бариха арга бии юм ааб даа, теэд саг хэрэгтэй, - гэжэ Булат, Альби­на Губеевтэн хөөрэнэ.

2024 ондо «Оросой Холбоото Уласай эрхэтэдые тааруу зохид гэр байраар ба гэр байрын ажахын туһаар хангалга» гэжэ про­граммаар Буряад ороной залуу бүлэнүүдтэ холбоото уласай бюджедһээ 48,6 сая түхэриг һомологдоо. Дэм­жэлгын мүнгэн зөөри гэр барилгада шэглүүлхээр, үгы гэбэл, бэлэн гэр худалдажа абахада болохо. Уласай бюджедһээ 20 сая түхэриг, нютагай бюджедһээ мүн лэ 20 сая түхэриг энэ хэрэгтэ һомологдоо