Нютагай үргэмжэ

Агын тойрогой урда талаар нэмжыhэн Хүнхэр нютагта бүхы наhаараа мал ажалда хүдэлhэн Цымжит Цыбенов 92-дохи хабараа угтажа байна. Нютагайнгаа дайнай ара талын ветераниие гэртэнь ошожо, газаань баяр ёhололой жагсаалда hургуулиин үхибүүд, түрэл гарал, нютагаархид сугларжа, концерт-наада харуулжа, аха захата­наа амаршалаа.

«Дүрбэн класс эрдэмтэй хүн, ород хэлэгүй, Сахалинда гурбан жэл соо алба гаража ерэhэн хүмби. Хүлдэ орохоhоо гэхээр мориндо мордожо, наяа хүрэнтэжэ, моринhоо бууhамби» гэhэн хөөрөөень нютагай зон hайн мэдэхэ. Жэлhээ жэлдэ бүхы найр нааданда, юрыншье үдэр нюта­гаархид гэртэнь орожо амаршалдаг, бэлэг сэлэгүүдые барюулдаг, ажа­байдалаарнь hонирходог заншалтай.

Энэ удаа майн 9-эй үдэр Агын тойрогой захиргаанай түлөөлэгшэ З. Амоголонов, колхозой түрүүлэгшэ Б. Жалсанов, Д-Д. Пурбуевай нэрэм­жэтэ Хүнхэрэй hургуулиин захирал Ж. Шойдокова, Ветерануудай соведэй түрүүлэгшэ Б. Цыденова гэгшэд гарай бэлэгүүдые барюулаа. «Агынгаа телевидениин hонинуудые хаража байгаарайт» гэжэ «Хүнхэр» гэhэн хүдөөгэй байгуулалтын соведэй зүгhөө түрүүлэгшэнь С. Цыден­жапова телевизор бэлэг ветеранда дамжуулаа. Энэ ушараар Цымжит Ринчинович Цыбеновэй үри хүүгэд, гүрэн дотор, хари газараар ажаhуудаг аша зээнэр, түрэлэйхид нютагайнгаа зондо халуун баяр баясхаланиие хүргэжэ байна.

Илалтын үдэр Хүнхэртэ баатар сэрэгшэдэй хүшөөгэй дэргэдэ митинг үнгэрөө, соёлой байшан­да эдир уран гартанай үзэсхэлэн дэлгээгдээ, «Дурасхаалай хана» зохёогдожо, нютагай Эсэгэ оро­ноо хамгаалгын Агууехэ дайнда хабаадаhан сэрэгшэдэй, дайнай ара талын ветерануудай фото-зурагууд табигдажа, олоной hонирхол татаа. Дайнай ветеран Дугар Дондоковой үри хүүгэд, аша зээнэр хамтадаа нютагайнгаа зондо сэрэгшын хоол – каша шанажа, халуун аяга сайгаар зоноо хүндэлөө.