«Алтан ойгоо угтаабди»

...Хошуун-Үзүүрэйнгээ һургуулиин газаа олоороо сугларһан, жагсаалда зогсоһон ша­бинараа, хүндэтэ багшанараа, хүмүүжүүлэгшэдээ, ажалшадаа тус һургуулиин захирал Виктория Бэ­ликтуевна Халзанова хани халуунаар амаршалжа, һуралсалдань, ажалдань зохёохы амжалта, зол жар­гал, элүүр энхые үреэбэ. Һургуулиин завуч, буряад хэлэнэй багша Эль­вира Владимировна Цыбанова, математикын багша Соёлма Жал­сановна Очирова, “Хошуун-Үзүүр” гэһэн хүдөөгэй байгууламжын дар­га Владимир Дашиевич Цыренда­шиев энэ һайндэртэ зүрхэ сэдьхэ­лэйнгээ һайхан үгэнүүдые зорюу­лаа, ерээдүйн, саашанхи замдань һурагшадтаа толотомо харгы хүсөө.

Һүүлшын хонхо зэдэлбэ...

Эндэ сугларагшадай зүрхэ сэдьхэл хайлуулһан һүүлшын хонхын баяр­та энэ бага комплектнэ һургуулиин 11-дэхи класс дүүргэһэн Александр Бадмаев дүү басагаяа, 1-дэхи класс дүүргэһэн, гоёор хубсалһан Сарюна Бадмаевагаа үргөөд, баярай дүхэриг соо ябажа, һүүлшын хонхо жэнгирүүлбэ... Тиихэдэ 9-дэхи класс дүүргэһэн хоёр үхибүүдые олон хүн үнэн зүрхэнһөө амаршалһан, һайн һайханиие хүсэһэн байна.

“Бидэнэр, 20 хүн, 50 жэлэйн­гээ ойн баярые угтаһан байнабди. Һургуулияа 25 жэлэй саана дүүргэһэн 33-дахи выпускые дүүргэһэн Алдар Цыбикмитов дуу ехэ гоёор дуулаа, дуун-бэлэгээ баряа. Холоһоо ерэһэн шабинараа фуршет дээрэ хүндэтэй дээрэ хүлеэн абаһан багшанартаа, бэлигтэй ажалшадтаа баяр баясха­лан хүргэнэбди.

Амтатайгаар, гоёор эдеэ хоолоо бэлдэһэн, ехэ һайнаар угтаһан Сан­жидма Чимитдоржиевна, Зоя Алек­сандровна, Виктория Тумэновна, Баир Цыбикович, Жанна Бимбаев­на гэгшэдтээ үнэн зүрхэнэйнгөө ба­ярые хүргэнэбди, һайн һайханиие хүсэнэбди. Эрхим багшанарые, бэр­хээр һурадаг үхибүүдые һургуулиин дарганар, багшанар үнэн зүрхэнһөө амаршалба, бэлэг сэлэгүүдые барюулба. 11-дэхи класс дүүргэһэн Александр Бадмаевта, дүү ба­саган Сарюнадань дурасхаалай бэлэгүүдынь дамжуулагдаа.

Багшанартаа баяртайбди

“Эхин классуудай багшанар Валентина Гомбоевна, Людмила Пунцыковна ехэ бэрхээр ажаллаа, ерээдүйн харгы замаймнай эхи табиһан энэрхы сэдьхэлтэй эдэ багшанартаа баяр баясхалангаа хүргэнэбди”, - гэжэ 8-дахи выпускын­хид хөөрэнэ. Түүхын багша Елена Цыденовна Дамдинова, ород хэлэ­нэй ба литературын багша Ирина Валерьевна Цыбикмитова, физикын болон физкультурын багша Баир Дугарович Халзанов, ОБЖ-гэй баг­ша Ринчин Станиславович Донду­бон, хүгжэмэй болон зурагай багша Альбина Федоровна Будожапова, информатикын болон математи­кын багша Саяна Цыдендоржиев­на Очирова, хүмүүжүүлгын ажалаар захиралай орлогшо, хари хэлэнэй багша Октябрина Очировна Мунку­ева, эхин классуудай багша Мария Григорьевна Спиридонова, бусад эрдэм мэдэсэеэ, баян дүршэлөө, бэлиг талаангаа манай мүнөө үеын шабинартамнай дамжуулжа байна гэжэ баяртайбди, дүүргэһээр 50 жэ­лэйнгээ ойе кафедэ тэмдэглэжэ ба­ярлаабди”, - гэжэ Гэсэгма Амуровна эдир наһаяа, һургуулиингаа жаргал­та хаһаяа хани нүхэдтэеэ дурдаба, һайхан дуунуудаа дуулалдаба:

Бууса хизаартаа

Балшар нүхэд сугларжа,

Түрэл нютагтаа,

түрэл нютагтаа

Уулзан байхадаа, һайн даа...

Шабинарайнгаа ерээдүйн, ам­жалта түгэс замыень дэмжэжэ, үргэжэ байдаг Хошуун-Үзүүрэй суута һургуулиин бүхы багшанарта һайн һайханиие, үргэн дардам харгы, үлзы хэшэг, зохёохы амжалта хүсэн, зориг эрмэлзэлтэйгээр урагшаа дабшахы­ень үреэе!