293
Манай нютагай захада боложо байһан түмэрһөө гадна Майск, Бархан нютаг шадар ой модон дүрэнэ. Амилхын аргагүй хүхэ утаан. Бүхы юумэн хүнэй адаглалта доро. 10 гаран түймэр сарагшад хүдэлжэ байна гэжэ Түймэр сарадаг албан Интернедтэ мэдээсэнэ. - -Тайгаар таража байһан ехэ түймэртэй 10 гаран гал сарагшад яажа тэмсэхэб? Одоол тэдэ адаглахаһаа бэшэ юу хэхэб даа? – гэжэ Гааргын ажаһуугша Батор голхорно.
Арбаад жэлэй урда тээ Баргажан, Хурамхаанда ехэ ган гасуур боложо, мүн лэ тайгын ехэ түймэр болоһон юм. Тиихэдэ Арзгун нютагай зүүн, зүүн-хойно талада ой модод угаа ехээр шатаа һэн.
“Түймэр саража байһан ажалшад нютагаймнай захада отоглоно. Халуун сай, эдихэ ууха юумэ абаашажа үгэе даа! Түймэрһөө ехэ аюул бү болоһой даа. Бурхандаа мүргэжэ, сэржэм сайгаа үргэгты”, - гэжэ уряалһан бэшэгүүд нютагай бүлгэмүүдтэ ябана.
Олон ажаһуугшад Ойн ажахын албанай мэргэжэлтэдтэ гомдоно. “Хорихо, ялада унагааха болоходоо түрүүн гүйлдэхэ. Түймэртэй тэмсэхэ һэргылэмжын ямар ажал тэдэ ябуулааб? Урда жэлнүүдтэ шатажа хатаһан модо түлеэн болгохо гэхэдэ, дараад һуугаа. Нютагай зон түлеэн болгожо абаад, сэбэрлэхэ байгаа ха юм. Мүнөө болоходо, тэрэ һалажа байһан модонуудые трактораар обоолжо этээд, галдахань гэжэ дуулдаа һэн. Юрэдөө, өөртөөш, хүндэшье бэшэ! Гал дүлэн тэрэ хатаһан модонуудта мүнөө хүрөө һаань, одоолшье һалаһан хэрэг болохо!” – гэжэ нютагаархид гомдон байжа хөөрэнэ.
Үнэхөөрөө, ехэ түймэрэй һүжэрөө болобол, гүйжэ тэрьедэхэһээ бэшэ ямар арга байхаб? Гал, уһан, һалхинай хүсэн угаа шанга ха юм даа. Хура бороон орожо, тайгын түймэр унтаргааха хэрэгтэ туһалха бэзэ.
Фото: ГАРМЫН Батын дурадхаһан гэрэл зурагууд
