– Олоной хабаадалгатай його - Буддын шажанай форумой үедэ үнгэрдэг бүхэли шэглэлэй хэмжээ ябуулгануудай нэгэн болоно. Йогын марафондо олон дасхалшад болон йогодо дуратайшуул сугларха гэжэ этигэнэбди. Тамирай болон соёлой талаар мэдээжэ хүнүүд хабаадаха тухайгаа мэдүүлээ. Августын зургаан болотор һонирхол түрүүлжэ үргэлжэлүүлэе. Ерэгты, һонин байха, - гэжэ Буряадай Толгойлогшын болон Засагай газарай Захиргаанай хүтэлбэрилэгшын орлогшо Ирина Доржиева хэлээ.
10 гаран жэлэй туршада йогоор бэеэ һорижо байһан дүршэл ехэтэй Софья Хабаркова болон Лина Дашиева заабариша-һоригшод «Сурья Намаскар» (Амар мэндэ, наран!) асанай комплекс харуулха юм.
– «Сурья Намаскар» асана комплекс Уласхоорондын Буддын шажанай II хуралдаанда зорюулнабди. Тиигэжэ бидэ тэрээндэ сагаан харгы нээхэбди. Сугларагшад нараяа мэндэшэлжэ, өөрыгөө мэдэхэ, сэдьхэлэй амгалан байдалай юртэмсэдэ ороходоо, баяртай байха гэжэ би этигэнэб, - гэжэ Софья Хабаркова хэлэнэ.
Улаан-Үдэдэ болон Ивалгын дасанда августын 12-14-эй үдэрнүүдтэ «Заншалта буддын шажан ба мүнөө сагай бэрхэшээлнүүд» гэһэн Буддын шажанай II Уласхоорондын хуралдаан үнгэргэгдэхэ гэжэ һануулая. Мүнөөдэр болотор 11 хари гүрэнүүдэй түлөөлэгшэд хабаадахаяа баталаа: Энэдхэг, Хитад, Вьетнам, Шри- Ланка, Лаос, Мьянма, Монгол, Камбоджа, Непал, Бангладеш, Пакистан.
Тус хуралдаанай нээлгэ августын 13-ай мигмар гарагта, Улаан-Үдэ хотын физкультурно-спортивна комплекс соо үнгэрхэ. Буддын шажанай болбосоролой асуудалнуудаар, ухаан бодолой ойлгосо болон мүнөө үеын ёһо гуримуудта, зүүн зүгэй заншалта эмнэлгэдэ тэрэнэй удха шанараар хөөрэлдөөнэй бүлэгүүд үнгэргэгдэхэ, тиихэдэ хабаадагшад буддын шажан ба байгаали хамгаалга, заншалта үнэтэ зүйлнүүд, мүргэлшэдэй уласхоорондын аяншалгын асуудалнуу- дые зүбшэн хэлсэхэ. Августын 14-дэ «Хамбын хүреэ» гэһэн Ивалгын дасанай дэбисхэр дээрэ - Орос гүрэнэй Буддын шажанай заншалта Сангхын түбтэ хуралдаан үргэлжэлхэ юм. Форумой айлшад «Бурхан багшын магтаал» гэһэн Хуралда (мүргэлдэ) хабаадахаһаа гадна, XII Бандида-Хамба лама Даша-Доржо Этигэлэй мүнхэ бэедэ мүргэхэ аргатай. Орос гүрэнэй Сангхын дурадхалаар Ивалгын дасанай дэбисхэр дээрэ Бандида-Хамба лама Даша-Доржо Этигэлэй захяанууд зүбшэн хэлсэгдэхэ. Байгша ондо Бандида-Хамбо ламанарай тушаалай байгуулагдаһаар 260 жэлэй тэбхэр ой гүйсэхэ - энэ хэмжээ ябуулгада хуралдаанай тусхай хуби зорюулагдаха.
Тус хуралдаанда бүридхэл https://reg. buddha-forum.ru/ гэһэн албан ёһоной сайт дээрэ үнгэргэгдэнэ, энэнь хабаадагшадта хуралдаанай сэдэбтэ һалбаринуудаар, һуралсалай болон соёлой хубинуудаар хабаадаха арга олгоно.