Сэлэнгын аймагай Темник тосхондо августын 3-да Ургамал ургуулдаг талын һайндэр - 2024 (наһанай хизаарлалга – 0+) наярхань. Тэрээндэ хабаадахаяа уласай бүхы аймагуудай түлөөлэгшэд ерэхэ. Адагынь 3 мянган айлшан Темник хүрэжэ ерэхэ гэжэ мүнөө хүлеэгдэнэ.
Шасарганын тоһо болбосоруулжа гаргадаг шэб шэнэ цех һайндэрэй түлэг дунда нээгдэхэ. Зүблэлтэ гүрэнэй хүл дээрээ байхада, эндэ «Шасарганын» томо ажахы ажаллажа, атаржажа байдаг бэлэй. Зэрлиг шасаргана дээрэ үндэр алдар нэрэ олоһон тэрэ ажахы хоёр мянган оной дабаа дабаад хосороо һэн.
2023 ондо шасарганын түүхэ шэнээр эхилбэ. Сентябрь һарада шасаргана болбосоруулгын нэгэдэхи цех ажалаа эхилээ. Тиигээд энэ үйлэдбэри хүн зондо шасарганын тоһоной хажуугаар шэхэртэйгээр шанаһан үнгын жамбын жэмэс, алим жэмэсүүдэй амтатай шүүһэ дурадхана. Цех табан тонноһоо ехэ амтан эдеэ үйлэдбэрилжэ үрдинэ.
- Сэлэнгын аймагта ургадаг шасарганын шанар онсо байдаг гэһэн мэдээн дүнэн дэлхэйе дүүргэн таранхай. Шасаргана хүнэй бэедэ туһатай. Орос гүрэндэ ондоо тээ Сэлэнгын шасарганада хүрэхэ шасаргана Алтайн хизаартал ехээр ургана. Буряад шасаргана тэндэхи шасарганаһаа булюу байна гэжэ эрдэмтэд элирүүлээ. Ургамал таридаг талануудай һайндэртэ буряад шасаргана буйлуулдаг шэнэ завод холбоо нүхэсэл байгуулжа, ажалаа эршэдүүлхэ зорилготой хэдэн хэлсээнүүдые баталха юм, - гэжэ Буряад Уласай Хүдөө ажахын ба эдеэ хоолой сайд Галсан Дареев хөөрэбэ.
Ургамал ургуулдаг талын һайндэртэ эмхидхэгшэд ехэ үзэсхэлэн дэлгээхэ. Хүнүүд тэрэнииень харангаа, газар элдэгшэдэй, хүдөөдэ хүнэһэ болбосоруулагшадай ажал хүдэлмэритэйнь танилсаха, амтан хоолһооньшье ама хүрэхэ болоно. Гадна хүдөө ажахыда хэрэглэгдэдэг оньһон зэбсэгүүд үргэн олониитын һонорто харуулагдаха байна.