Агаарай онгосонууд олошорхо

Россиин агаарай компанинуудай өөһэдтөө бүтээгдэһэн вертолёдуудые худалдан абалгада тэдхэмжэ мүнгэн гүрэнһөө үгтэхэ. Энэ түлэб агаарай онгосонуудай парк шэнэлжэ, холын аймагуудтай холбоо һайжаруулжа, тэндэ хэрэглэгдэхэ эд хэрэгсэл дээшэлүүлхэ хэрэгтэ һайнаар нүлөөлхэ юм.

- Алас Дурна зүгтэ илангаяа шухала энэ асуудал тэндэ албанай хэрэгээр ябахадаа хэлсээ һэмди. Энэ шэнэ хэмжээ ябуулга бага авиацида тон ехэ туһа боложо үгэхэ гэжэ найданаб. Тэрэ тоодо нёдондо түрүүшынгээ ниидэлгэ хэһэн олон үүргэтэй хүнгэн «Ансат» вертолёт хэрэглэжэ эхилхэ хэрэгые урагшалха. Энэмнай хүсэд дүүрэнээр манда бүтээгдэһэн машина юм гэжэ һануулнаб. Холо ойрын газарнуудые хоорондонь найдамтайгаар холбохо шухала. Тиихэдэл хүнүүд нэгэ можоһоо нүгөө можо һаадгүйгөөр ябалсажа байха болоно, - гэжэ орлогшо сайдуудта Россиин Засагай газарай Түрүүлэгшэ Михаил Мишустин мэдүүлээ.

Гүрэнэй тэдхэмжэ можо хоорондын болон нютагуудай зөөлгэдэ хабаадуулагдадаг вертолёдуудта хүргэгдэхэ. Гол эрилтэнь гэхэдэ, агаарай онгосо 2016 онһоо урда бэшэ бүтээгдэһэн байха ёһотой гэжэ Михаил Мишустинай гараа табиһан тогтоолдо хэлэгдэнэ.

Тэдхэмжын хэмжээн вертолёдой бүтээгдэһэн онһоо болон тэрэнэй багтаамжаһаа дулдыдана. Эгээл ехэ – 56 сая 900 мянган түхэриг 11–30 хүниие багтааха болон нэгэ жэлһээ ехэ үлөөгүй вертолёдто үгтэхэ.

Агаарай компанинуудай гаргашануудые хүнгэлхэ түлэб 2012 онһоо эхилээшье һаа, гансал самолёдуудта дэмжэлгэ үгтэдэг байһан юм. Засагай газарай Түрүүлэгшэ Михаил Мишустинай Камчаткын хизаарта албанай хэрэгээр ерэхэдэ, тэндэхи үйлэдбэриин юрэнхы захирал энэ түлэбтэ вертолёдуудые оруулалсахые хандаа һэн. Тиихэдэ Юрэнхы сайд энэ дурадхал дэмжэжэ, Москвада ерэһээр, Минпромторгдо, Минтрансда болон Минфиндэ зохилдуулан тааруулагдаһан түлэб Засагай газарта оруулхынь даалгаа һэн.