​Буряад Уласта үлтэнэгэй болон рапсын тоһо үйлэдбэрилнэ

Ноябриин 8-да Буряад Уласай хүдөө ажахын сайд Галсан Дареев үлтэнэгэй (конопля) болон рапсын тоһонтой танилсуулжа, нэрлэгдэгшэ культурануудые тариха холын хараа бодолнууд тухай хөөрэжэ үгэбэ.

- 2021 ондо 100 гектарта үлтэнэг, 200 гектарта рапс тарижа туршабабди. Хоёр жэл соо фермер Тамир Шагдаров Буряадай хүдөө ажахын академитэй хамта үлтэнэгэй тоһо абалгын ажал эрхилнэ, - гэжэ сайд Галсан Дареев хэлээ.

Үлтэнэг тарихада, рапсада орходоо, гарзатай болоно. Харин тоһоорнь худалдаха гэбэл, хэды дахин үнэтэй. Тарихадаа, техническэ үлтэнэг тариһан байна. 1 тонно үлтэнэгэй тоһо 700 мянгаар, 1 тонно рапс 100 мянгаар наймаална гээд сайд элидхээ. Хэдэн зуугаад жэлэй туршада хүн түрэлтэн үлтэнэг ногоо үйлэдбэрилжэ, бэеын элүүр энхэдэ туһатай эм дом абадаг гэжэ мэдээжэ. Үлтэнэгэй тоһон олон тоото һайн бодосуудаар, витаминуудаар баян гээд, эрдэмтэ эмшэд үни заяанай гаргаһан гээшэ. Эм дом хэхэ хэрэгтэ ехэ үргэнөөр хэрэглэгдэдэг юм. Иммунитет бодхоодог, шарха болон хабдарнуудые эдэгээдэг. Уужа байхада, хүнэй досоохи болон арһан, хюмһан, үһэн һайжардаг. Нервэ муутай зон үдэртөө хоёр халбага уужа байбал, номгон даруу, аалин зантай болохо. Юрэдөө, үлтэнэг ногооной тоһон элүүр энхэдэ ямаршье харша үзэгдэлгүй гээд, эрдэмтэд гэршэлһэн.